2010 هيونداي سوناتا 2400 تجربتي مع لمبة المحرك Check Engine

8 0

لايمكنك التصويت حتى الحصول على 20 نقطة على الأقل
إضغط هنا للإخفاء

هالغتتدي 24
قبل 11 سنه و 4 شهر

السلام عليكم و رحمة الله و بركاته ... كل عام و أنتم جميعاً بخير .. و رمضان مبارك علينا و عليكم .

أحبّ أطرح عليكم موضوع تجربتي مع سيارتي العزيزة هيونداي سوناتا 2010 ، 2400cc ، ماشية تقريباً 90,000 كم ، و الحمد لله ، للفائدة .. لا أكثر و لا أقل .

بصراحة ، أنا أحب أسوّي صيانة السيارة بنفسي ؛ يعني مو بالشركة ، و ما شاء الله تبارك الله ما قد واجهت أي مشكلة مع السيارة .
قبل كم يوم كان موعد صيانة الـ90 ألف ؛ فاشتريت قطع الغيار كالعادة و اتجهت للميكانيكي اللي أتعامل معاه دائماً .
غيرت زيت المكينة و الفلتر ، غيرت زيت الجيربوكس ، غيرت فلتر الهواء و فلتر المكيف ، غيرت البواجي و نظفت البخاخات ، و بدلت الكفرات X و رصصتها .. كالعادة مافي شيء جديد .
تفاجأت بعدما خرجت من عند الميكانيكي آخر الليل إنه لمبة المحرك (Check Engine) والعة .. انصدمت صراحةً و قلت غريبة ، أول مرة تصير ! .. قلت خليني أمشي عليها شوية يمكن تروح .. مشيت عليها حوالي 15 كم و برضه ماهي راضية تروح !
المهم ؛ رجعت البيت و قعدت أبحث و أقرأ في النت .. اللي يقول افصل البطارية و ارجع اشبكها بعد 10 دقائق ، و اللي يقول سوّي إعادة تهيئة (reset) للكمبوتر ، إلخ .
فصلت البطارية في اليوم الثاني ، طفت اللمبة لمدة 30 دقيقة تقريباً ، و لكن رجعت اشتغلت ثاني !
قلت يمكن البطارية يبالها تغيير لأنه كانت ضعيفة و آن الأوان لتغييرها .
غيرت البطارية ، طفت اللمبة ، و رجعت ولعت مرة ثانية !
وش الحل ؟!
قلت مافي غير فحص و إعادة تهيئة بالكمبيوتر (reset) مثل ما قرأت في النت .. أخذتها اليوم و قلت خليني أمر على فرع صيانة الناغي اللي هو BESF1TS .. وصلت هناك و قلت للمهندس الفلبيني الحكاية كاملة .
سألني : طيب نظفت البوابة ؟
قلت : وش البوابة ؟
أشر لي عليها ؛ و هي مكان وصلة المكينة مع أنابيب فلتر الهواء (throttle body).. قلت له : لا !
المهم ، لما فكها كانت مليئة بالأوساخ ( سواد ) .. نظفها و الحمد لله راحت اللمبة و مافي أي مشاكل .

الآن عرفت إنه المرة الجاية لازم أنظفها ، إن شاء الله .

و إنها ممكن تكون أحد أسباب ظهور لمبة المحرك !

حبيت أنشر لكم الموضوع لتعم الفائدة ، و كل عام و أنتم بخير و رمضان مبارك علينا جميعاً .. و سامحونا على الإطالة .

لا تحرمونا من دعائكم ، و السلام عليكم و رحمة الله و بركاته .

إبلاغ

الردود