تجربتي للالنترا 2015 وتقييمي لها

شويخ من أرض مكناس 2822
قبل 10 سنه و 4 شهر

السلام عليكم
اليوم نشوف هالتجربه الالنتراويه
فالبدايه كنت ناوي الفوكس ST ( سياره صغيره وحقت خطوط ) قلت مافيه غير الفوكس الالمانيه
رحت لوكالة فورد واخذت عنها برنت
وكنت مركز على موضوع التنازل فقلي موظف بنك الامارات اذا تفكر تتنازل بعد فتره انصحك تاخذ سياره تكون دارجه في السوق ومرغوبه
الفوكس غير مرغوبه وانا سنتين وبترك هالموتر

قررت على الالنترا تكون فل كامل
استلمتها يوم الاحد اللي راح لو ماجلست اطارد وراهم كان ماراح اخذها الا بعد العيد
الوكاله عليها زحمه وقت الاستلام سياره ورا سياره اعتقد هونادي راح تطغى على تويوتا في السيارات الصغيره والمتوسطه
اخذت الموتر وعبيت فل 95 وعلى طريق الزاحميه مشتااااااق اجرب رساوت الموتر على ال 200 والعزم وصوت المكينه

المواصفات
شاشه كميرا خلفيه الشاشه بالمس بلوتوث دمج الجوال معا الصوت + الصوت يرتفع اذا مشيت وينخفض اذا وقفت كميزه في الصوت
الاشارات مثل السيارات الاوروبيه
لمسه خفيفه تعطيك 3 غمزات وتوقف وتقدر تخليها 5 او 6 او 7 غمزات
مثبت سرعه شغال ميه ميه
فتحتا التكييف عدلوها بدل ماتكون تحت عند الركب صارت فوق هذا عيب وعدلوه
المرايات تسفيط اكتروني حتى لو السياره مطفيه
اعجبني الطبلون لييين او مصنوع من ماده مثل المطاط او الاسفنح وليس بلاستك فكرته حلوه مستحيل يطلع اصوات هربده الماده اللي صنعوا منها الطبلون
لو كملوها على جميع الاماكن كديكور الباب والمسجل وغيره مستجيل السياره تطلع اصوات طقطقه
لانه لييين مره وينضغط بالاصبع كئنه محشو بالاسفنج

المراتب ورا واسعه بس المشكله كراعين تحك فالدركسون او اني متعد على جلسة مرتبة الفورد

الدركسون كهربائي فيه لمبه تولع عند التشغيل وتطفي واحس انه كل ماتسرع كل مايكون ثقيل والعكس صحيح
مع الحفر والمطبات على سرعات 120 ماتحس الدركسون يتحرك او تلف معك اشوف الدركسون مشاءالله ثابت
عزل الهواء بالنسبه لي اطنخ من الفورد بمراحل ماعدا صوت يمين ويسار بسبب المرايا لحجمها الكبير
المرايه مساحتها كبيره تكشف الخلفيه كامله

اعجبتني شاشة الكميرا حقت الريوس صرت ماناظر ورا وريحتني مره والله كنت محتقرها لو دريت ركبتها على الفورد من زمان

السياره على 200 اشوفها ثابته الا اذا كان الطريق فيه هوا او تشطف شاحنه او فيه حفر احس السياره بتهج
الموتر يخووووف على السرعات العاليه واحس الطريق مثل البرق عكس الفورد ماتحس بالسرعات ماقدرت اسرع اكثر

نظام ال ABS على 180 جربته شغال وتسمع صوته لكن ماتحس انه يقدر يمسك السياره لانها خفيفه
نظام ال ABS على 140 ونازل اشوفه ممتاز مؤدي الواجب واكثر
الانوار مايحتاج اتكلم فيها مثل الشمس
العزل الارضي ماراح اتكلم فيه كل السيارات اليابانيه والكوريه عزلها فاشل
مايحتاج تاخذ قير عادي
العزم على القير التماتيك فيه نشاطه ماشاءالله عليه فزته ولا فزت الفورد

السياره فالمدينه انا اعطيها 10 على 10 ان بغيتها عزم انطلاقه خفه رشاقه خشخشه بين السيارات تحسها رياضيه
المكيف ثلج واثلج من مكيف الفورد حتى فعز الحر

القزازا الخلفي ماتشوف منه شي الرؤيا غير واضحه
تكييف خلفي

السياره بشكل عام كرتون ومهما يزرعون فيها من انظمه ماراح يفيد معها وقت الحوادث البدي مرررره ضعيف

السياره داخل المدينه مافيه اروع منها
خارج المدينه على الخطوط عطها النمره السادسه وشغل مثبت السرعه على 140 مافيه احلى هذا حقها ولاتفكر تزود السرعه
احس تسارعها في النمره الثانيه والثالثه انشط من النمره الاولى
صوت المكينه لايعتبر مزعج مقارنه بالاكسنت وسيارات ال 4 سلندر
المكينه 2.0

الشي الاخر
عطوني صيانه مجاينه تغيير زيوت وغيره الى 20 الف كيلو
عطوني ضمان 3 سنوات او 100 الف كيلو
بنك الامارات عطاني ضمان 5 سنوات او 200 الف كيلو مع كتيب الضمان تبع شركة الاتحاد للتامين الشامل

وش علاقة شركة التامين تعطيني ضمان 5 سنوات او 200 الف كيلو ؟
موظف الوكاله يقولي تلتزم بضمان كتيب المصنع 3 سنوات او 100 الف كيلو
وموظف البنك يقولي تلتزم بضمان شركة التامين لخمس سنوات !!!

المهم شريت مسامير قفل تامين على الجنوط الاربع حمايه ضد السرقه الجنوط شكلها مشاءالله ممتاز

الصورتين الاخيره صورها واحد من الشباب بجوال مدري وشكله بس وش رايكم فيها

في الاخير السياره تستاهل كل ريال يندفع فيها

سؤال لهل الخبره
حسب الكتلوج عن زيت القير وقت التغيير
زيت القير العايدي ياخذ 1.8 لتر
القير الاوتوامتيك ياخذ 7.3 لتر

ليه اختلاف السعه اللتريه بين القيرين رغم انها نفس الحجم