هاذي نتيجة الإهمال ... تحذير مهم لأصحاب الاكسنت . قصة طويله.

15 2

لايمكنك التصويت حتى الحصول على 20 نقطة على الأقل
إضغط هنا للإخفاء

quartz 2010 1
قبل 10 سنه و 3 شهر

السلام عليكم ورحمة الله وبركاته : 

موضوعي اليوم هو عن موقف صار معي وأتمنى انكم تستفيدون منه  وخاصة اصحاب الاكسنت 

انا الحمد لله سيارتي اكسنت 2010 مستخدمها استخدام شاق والحمد لله السيارة ممتازة وتتحمل 

اسافر بها خطوط فوق الالف كيلو رايح وارجع بها اليوم الثاني نفس المسافه والحمد لله سيارة ممتازة بس متعبه

بحكم حجمها 

مرة من المرات كنت ابغى اسافر بها مسافه حول 1500 كيلو متواصله رحت اغير الزيت  والسيور الخارجيه 

للمكينه قال لي  الميكانيكي  ان سير التايمن لازم يتغير  لان له صوت خرخره وكانت السيارة ماشيه 158 الف

كنت اعرف من اول انه لازم يتغير لكن كنت دايم اجله    كل شهر اقول الشهر اللي بعده    المهم قلت للميكانيكي

بسافر واذا رجعت بغيرها عندك واتفقنا على السعر وكل شي    وفي اليوم الثاني توكلت على الله ومشيت 

بعد حول 700 كيلو وانا متجاوز شاحنه ووراي يوكن  داعس يكبس  اشوف السيارة ماتدوس ادعس بنص زياده مافي 

فايده اطالع في الطبلون القى اللمبات حقت الطبلون مولعه والسيارة طافيه  وانزل على التراب عشان اليوكن

كان بيطلع فوقي  واوقف    اجرب  اشغل يطلع صوت خرخره جهة المكينه  المكان قطعه ماحولك احد 

وادق على امن الطرق  عطاني ارقام سطحات وقال دبر نفسك 

وادق على الاول قال بوصلها الرياض ب 500 والثاني  600  اخر شي  واشوف لي سطحه جاية واشر له ووقف 

وبشق النفس مشى ب  400 واحملها ونمشي   ويالله وصلت الرياض قد هلكت  ونروح الصناعيه القديمه

اول مرة ادخلها   مااعرف شي فيها  كل ما اروح لميكانيكي قال اكيد البلوف مطعجه ويبغالها تغيير والراس ينخرط

وبكرات وشداد  وعاد شوف الاستغلال اذا سيارتك فوق السطحه يعرفون انك متعطل ومضطر 

الي يقول نصلحها شغل يد ب 1500 والثاني  1000 وكل واحد بسعره لو سيارتي تمشي كان دورت وتشرطت 

لكنها مافيها حياه  وفوق السطحه وراعي السطحه يقول ابغى انزلها وامشي  قلت امش ونت ساكت ماني منزلها 

الا عند واحد يعجبني سعره  او يكون معقول  

والصراحه اكتشفت ان الورش اللي في الصناعيه مافي رؤوسهم شي  تخيلو واحد يمني يقول اكيد 

ان يبغالها برمجه هاذي مشكلة السيارات القديده !!!!

بالله هاذا ينقال عنه ميكانيكي  

المهم وانا الف اذن العشاء وقفلت المحلات وراعي السطحه ازعجني  واوقف عند واحد سوداني والله اني ماني مقتنع

لكن وش نسوي  واتفق معه انه يفك سير التايمن ويركب جديد اذا مااشتغلت فأكيد نفك المكينه  واروح اشتري 

سير التايمن اللعين والبكرات واعطيه واروح ادور لي شقه اسكن فيها  واجيه صباح اليوم الثاني 

طلع اللي كنت خايف منه ان البلوف تكسرت  المهم فك الراس وطلع البلوف مقصوصه ومكسرة والراس فيه طعجات 

واروح اشتري لها بلوف وجلد بلوف وبواجي ووجه الراس وغراء    والراس وديته المخرطه خرط وكبس البلوف 

ب 250 بعد المكاسر وننتظر لليوم الثاني عشان الراس يخلص  اخذت الميكانيكي الراس من المخرطه ووداه الورشه

وانا معه ويبدا التركيب بعد صلاة الظهر مباشرة اللي لاحظته ان المكينه ضيقه ومتعبة جدا للميكانيكي في التركيب

اذن العصر وباقي السيور الخارجيه وبعض الحاجات البسيطه ونروح نصلي ونرجع وكمل التركيب 

وجت المرحلة الحاسمه وبدا يشغل السيارة تتفتف وتطفى  قلت في نفسي هاذا الميكانيكي مايعرف يشتغل ووو

واشغل وادوس  اشتغلت تمام وتفتفت شوي يمكن دقيقه وبعدها صفيت وزان صوتها  قال السيارة تمام توكل على الله

قلت والله مااروح الين اتاكد  من شغلك وانتظرها حول ساعه شغاله قربت كرسي عند المكينه واتسمع والاحظ صوت 

غريب ولا شي لكن السيارة تمام مافيها مشاكل واحرك من عنده اخذت لفه اشوف الطبلون اثر السيارة طافيه اشغل 

تشتغل عادي وكل مااضغط كلتش والف الدركسون السيارة تطفى  انا انغبنت قلت انه ماعرف يصلحها 

رجعت له قال هذا من سلك البنص حق البنزين يبغاله وزن  وزنه ومشت تمام  رحت نمت والصباح توكلت على الله

وسافرت يوم عديت الرياض ب 200 كيلو كل مااهدي ابغى اوقف في محطه تطفى السيارة  انقهرت  وفكرت انها 

مابتوصلني  وان المكينه بتخبط المهم عبيت بنزين ومشيت ارفق عليها حول 500 كيلو بدون مكيف وعذاب 

وبعدها شغلت االمكيف واجلدها 160 والسيارة تمام  وصلت الديره  والسيارة ماعاد تطفى راحت المشكله نهائيا

مادري وش كان سببها  

السلبيات في السيارة بعد تغيير السير :

ضعف بسيط في العزم  وصوت حنه اذا طولت بالنمرة  والباقي تمام 

مشيتها للحين حول 7000 سفريات ومكيف شغال والسيارة تمام مافيها مشاكل 

القصة طويله لكن حبيت انكم تنتبهون لسير التايمن الزفت  ( وش المشكله لو حطوه جنزير وفكونا منه !!!)

لانه بسببه فكيت المكينه وغيرت بلوف وخساير وتعب لايعلمه الا الله سبحانه  كان بأمكاني اني اتفاداها لكن

هاذي ضريبة الاهمال  
 
اللي لاحظته ان قطعها رخيصة ومتوفره جدا  وهاذي ميزة الاكسنت لبى قلبها 

حبيت انبهكم عن هذا السير  والله يوفقكم

إبلاغ

الردود