أضف سؤال أو موضوع جديد          

X قصتي مع سوناتا 2013 بالحلو والمرررررر X

up 93 down 13
ابو يزيد 000 8688
قبل 3 سنه و 2 شهر



السلام عليكم ورحمة الله وبركاته

كيفكم عساكم طيبين ان شاء الله

اليوم موضوعنا عن قصه لقريب لي والقصه قبل سنه تقريبا ونص :)

طبعا كنت طفشان وتذكرت هالسالفه وقلت ليه ما انزلها لكم !!

فالسالفه الله يطول اعماركم >> نسيت نصها هههه لكن مافيه مشكله

كان معا ولد عمتي سوناتا 2012 أو 2013 مطلعها جديده من الباحه وانا الآن بأتكلم كأني انا راعي القصه فبقولها كانها سارت لي

والسالفه طويله شوي يعني اللي بقراها لازم يكون رايق وماهو مستعجل اذا مستعجل اقراها بوقت ثاني وترا ما تاخذ ولا 7 دقايق

----------------------------------------

كان عندي اجازه فنزلت بسيارتي من الباحه للرياض اغير جو وازور اختي

فمشيت للرياض وأول ما وصلت الرياض كانت الساعه 9 ونص الليل وقلت بأروح اسلم على اختي لاني قلتها اليوم بأجي

فأفتجهت لأختي ووصلت عندهم ووقفت السياره وطفيتها وقفلتها

سلمت على اختي واخذت فنجال وقلت يالله عاد عن اذنكم بس حبيت اسلم وان شاء الله بكره اجيكم بدري وناخذ علومكم

فنزلت للسياره وانا نازل للسياره جت يدي على جيبي زي كل مره قلت لا يكون نسيت شيء

فدورت لجوالي وما حصلته وقلت اكيد انه عند اختي

وزدت ديورت ورجعت لها وقلت لها نسيت جوالي عندك

وندور للجوال ندور له ما حصلناها ودقينا عليه وما فيه صوت ودقيت مره ثانيه وما فيه صوت والمره الثالث قفل الخط !!

قلت اجل شكله بالسياره وشكل الشحن خلص منه

فنزلت للسياره وكانت هنا الفاجعه الصغرى

لقيت القزازه مكسوره وباب السواق مفتوح

ياولد وش صار وش السالفه

وعرفت اني نسيت جوالي وهذي اخرتها

إنا لله وانا اليه لراجعون

فعودت قلت لاختي اللي صار ومشيت , ورحت صلحت القزازه وانا مقهووووووووووووووور

وبعدها اخذت لي شقه ونمت بالملعنه وما ادري كيف نمت من الغبنه ومن بكره رحت محلات الاتصالات وطلعت لي شريحه جديده و جوال جديد

ويوم رجعت للسياره ادق ادق على رقمي الاول , الا وهو مقفل وقعدت من الغبنه والقهر ادقق ادقق ادققق ادققق وادعي عليه

وشوي وانا اكرر الاتصال كانت هنا المفاجئه

شبك الخط !!!!!!!!!!!!!!!!!!!!!!!!

وانقز مثل المجنون ويرتفع عندي الادرينالين ويجي شعور الله الشاهد به

المهم واتجهز للمكالمه :)

واستناه يرد !!! ورد علي واقول الووووو

ويقول هلا فيك اخوي

وادخل بالموضوع على طول , واقول بالله وش استفدت الحين يوم انك سرقت الجوال , اقسم بالله ما تستاهل الدعاوي اللي دعيتها عليك , وما تسوى تأنيت الضمير اللي ينتابك هذا اذا كان عندك ضمير اصلا , بالله كيف تطاعوك نفسك انك تلبس او تأكل من مال حرام , ياخي ما تخاف ربك !! ماتعرف وش قال ربك في اللي يسرقون , قال السارق والسارقه تقطع ايدهم , وانت مستهين بالهشيء , خسرتني قزازه جديده وخسرتني جوال ورقم جديد , وخليتني ادعي عليك وانت عارف ان دعوة المظلوم مابينها وبين الله حجاب , عشان 500 او 1000 ريال تبي يسير لك او يسير لاهلك شيء لا سمح الله !! إذا كان عندك ذمه وضمير وتخاف من ربي وربك فرجعلي جوالي وانا مسامحك على كل شيء سواء القزازه او فعلتك هذي

وكان رده مفاجئه ايضا , يقول , والله اعذرني ياخوي وانا مدري وش اقولك لكن اخوي الصغير عسا الله يهديه مرافق له بعض من اصدقاء السوء وتحدوه يكسر قزازك وياخذ جوالك ان كان رجال , ويقول قمت وكسرت القزازه , لكن والله اني جلدته جلد الى هاللحظه ويدي توجعني من شدة ضربي له عشان يعترف من وين جاب الجوال وقالي هالسالفه , فإن كان هذا جوالك فأبد انا تحت امرك واللي تامر عليه يسير !!!!!!!!!!

انا مثل اللي مو مصدق قلت من جدك !! قال ايه والله واتمنى تسامحني !! وقلت ابد مسامحك ومحللك بس رجعلي الجوال , قال خلاص بس وين نتقابل , وقلت اللي تبيه , وقال عند محطه مشهوره بالعزيزيه والله نسيت اسمها وقلت اوك , ورحت لهم ولقيت رجالين

سلمت عليهم , وقام واحد منهم يحب راسي ويقول سامحني , وقلت ابد مسامحك ومحللك يارجال , وقام بيسلم على يدي وقلت عيب عليك الله يسعدك والغلط مو منك من اصدقاء السوء اللي لعبو في راس اخوك , وقال والله اني جلدته وربيته , بس تكفى لا تكبر الموضوع ترانا على قد حالنا والمشاكل علينا من كل محل ولا نبغا مشاكل ثانيه , وعطوني الجوال وقلت ما تقصرون وما سار الا كل خير , والله يستر علينا وعليكم , وقالوا الله يوفقك وصدق نادرين اللي مثلك , قلت بالعكس انتم اللي نادرين , وقعدت اخذ معهم واعطي , وفي الاخير قلت اي خدمه !! , قالوا ابد سلامتك بس ان كان تقدر توصلنا على طريقك على شارع ( !!! ) فبتسوي خير فينا , ونعرف ان ثقلنا عليك لكن تعرف حالتنا وكذا وان كان عليك احراج فعادي والله باخذ تكسي من هنا

قلت بس !! , ما طلبتوا شيء , اركبوا , وقالوا جزاك الله خير , وركبتهم معي , وقعدوا يسولفوا عن الولد وكيف سرق الجوال , وكذا ,وانا داخل جو معهم , الا وسكين من وراي في حلقي !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

ياولد اذكر الله , ياولد تعوذ من ابليس ,>> جنب يمين بسرعه , بسرعه اقولك ماتفهم انت , يالله !!!!!! تبيني اذبحك يعني !!!! ترا ما وراي شيء اخسره

وانا اقول ياولد تعوذ من ابليس خاف ربك ياخي وش تبغا مني !! قال اقولك جنب , حمار ثور انت , ما تفهم !! واجنب , وقال لي بكل حقاره وبكل استهزاء الحيوان

شفت الجوال اللي تو عطيناك اياه , سلمني اياه الحين ههههه وجوالك الجديد ومحفظتك وكل اللي بجيبك وانزل من السياره

واقسم بالله لو تسوي شيء من هنا ولا هناك لانحرك على طبلون السياره ترا ما وراي شيء اخسره

قلت يعني كلام ربك ماله اي قيمه بخصوص قتل نفسه معصومه !! ياويلك من ربك , وعصب علي وقال شكلك تبي تموت صح !!!

واقول خلاص خلاص واعطيهم كل شيء ويقولون انزل من السياره ورح بعيد ووالله لو تسوي شيء لادعسك

نزلت وسلمت امري لله وقلت اللهم ودعتك نفسي وسيارتي فاحفظهما وانت خير الحافظين

حط رجله واتفكيت من شرهه وانا كلي قهر وندم وغبنه , توي شريت السياره وما تهنيت فيها ,ومطلعها بدم قلبي , جوالي يوم انسرق والله عيت انام من القهر مع انه ما يسوا الف ريال , فكيف السياره اللي تسوا محل جوالات , فقعدت والوم نفسي لاني ركبتهم معي وقعدت اقول لو ولو لكن ما عاد ينفع الندم والحسره دام طاح الفاس بالراس , ارضى بالواقع , وحاول تشوف حل , الندم ما راح يساهم في شيء , وهذا مقدر ومكتوب

قمت واتصلت على 997 اتوقع وطلع الدفاع المدني ههههههههههههههههههههههههههههه

وقالوا اتصل على مدري مين وقمت اتصل على هذولاك وقالوا اتصلوا على هذولي لين ما فرجها ربك وقدمت بلاغ عن السياره

كلمت ربعي وجو 3 بسيارتهم وركبت مع واحد ودرنا على المنطقه كامله والاحياء كامله في هالجزء وما حصلناها مع الاسف

رجعت للبيت وعيت انام من القهر , ومن اليوم الثاني رحت راجعت الشرطه وقدمت بلاغ ثاني على الورق قدامهم ومثل كل مره تسليك للشعب ومافيه اهتمام

دريت ان ماعندهم الا الطقاع ودعيت ربي عليهم انه يجي يوم ويسير لهم شيء ويكون اللي في يده القرار بعد الله سبحانه غير مهتم مثلهم يوم يجونهم المواطنين ويسلكون لهم ولا يهتمون فيهم

لو تقول سياره فيها دعاره ولا متفجرات 24 ساعه الا وهم قافطينها , عندنا استخبرات ومباحث ماهم هينين لكن بس يخدمون الدوله والمواطنين محد لمهم

المهم كان معي قريبي وزميلي واخوي وكل شيء بالنسبه لي , ما قصر بيض الله وجهه , صراحه تنكشف لك المعادن وقت الشده , واحمد ( اللي هو قريبي ) ما قصر معي وخدمني بعيونه , والله من الساعه 10 الصباح ياشباب الى المغرب واحنا ندور وندور للسياره في الاماكن المشبوهه لكن لا حياة لمن تنادي واحمد كان عاطل فكان دايم يجيني الساعه 10 وندور للسياره

استمرينا لمده يوم يومين ثلاثه اسبوع اسبوع ونص اسبوعين ........... الين ما جينا عند عماره بالنظيم

ولقينا عندها سوناتا بيضا مثل سيارتي لكن مختلفه بس شكلها مدر للشبهه

يعني مضلله كتم وجنوط حديد اسود ولوحاتها مختلفه , وقلت لـ احمد وقف وقف هنا , قال اش فيه , قلت هذي السياره مشبوهه يمكن تكون سيارتي ما تدري , قال يارجال تونا مرينا بمليون سوناتا بيضا وقفت على هذي !! قلت ياخي ماتدري , قال اوك اللي تبغاه يا سيدي يصير هههه , وقلت تسلم لبى قلبك

ونزلنا ودرنا على السياره , سيارتي كان عليها تضليل اصلي هذي تضليها عادي ومختلف , وانا كانت سيارتي عليها جنوط النجمه حقت النص فل لكن هذي حديد اسود , بس السقف مثل سقفي ( بانورامي ) عشان كذا شكيت فيها , لان مافيه سوناتا سقف بانوراما بجنوط استاندر حديد

وهنا تذكرت اني ملزق ( شعار الاتحاد ) على تانكي البنزين وانطلق على جهه تانكي البنزين واشوف اثر اللزق باين , باين انه فكها , واقول والله هي , واتذكر كمان حك خفيف على الاسطب الخلفي يمين مع الصدام , واشوف انه الحك نفسه بالتمام , واقول جبناها يا احمد , واقعد اناطط من الفرحه واتعلق في احمد هههههههههههههههه , وقلت جبت عيال الكلب والله لا اوريك فيهم , اه يا قلبي ابي اشفي غليلي فيهم , واصارخ مثل المجنون هههههههههههههههههههه فرحان ومن حقي :)

وادق على الشرطه ومثل العاده دق على هذولي وهذولي يقولون دق على ذولاك الين ما وصلت عند واحد وقال خلاص اركبها وش تبي !!!!!! ههههههههههه قسم بالله اني ضحكت وقلت الشرهه مو عليك, الشرهه علي انا , وقلت لابوكم لابو اللي يتعامل معكم حسبي عليكم الله , قال وش تبي ياخي لقيت سيارتك اركبها وخلاص !! قلت يعني مافيه الادله الجنائيه مافيه احد يجي يشيل البصمات واثار الشعر , مافيه تشيكك على السياره لا يكون سار فيها جريمه قتل او خطف , الامر بسيط ما شاء الله هههههههههه , قال تبيني اقفل البلاغ باقفله وتقدر تروح بالسياره , وبكره راجعهم وشف الاجراءات , قلت لا يكثر لعنبو من وضفك كيف توضفت انت اصلا , واقفل في وجهه

وادق على زوج عمتي لواء ومعروف وقلت تكفى يابو سلطان اخدمني , قال امر , قلت ابي تتوسط لي , لقيت سيارتي المسروقه , وهذولي يقولون لي اركب سيارتك وش تبي !! وشرحت له السالفه كلها , وقال ابشر , وكلها نص ساعه الا و 4 دوريات فورد وربع عندي , قالوا لي انت تبغا السياره ولا تبغا السياره واللي سرقها , قلت والله ابي اللي سرقها اكثر من السياره , تكفون يا الاشناب الفزعه ابي اشفي خاطري فيه

وجاء زهراني وقال ابشر ياولد العم , والله لامسكه بسنوني لك ههههههه , قلت تسلم سنونك الله يسعدك

وقالي خلاص انسى الموضوع , رح لبيتك , وبأتصل فيك وجب معك سطحه عشان تشيل السياره , قلت ليه , قال انت ما تبغا الحرامي , قلت ايه ,قال خلاص بس سو اللي اطلبه منك , قلت على امرك ياولد العم

قعدت 4 ساعات وكانها 4 سنوات , ودق علي , وقال جب سطحه وتعالي الموقع , قلت وش سار بشر , قال اذا جيت تعرف كل شيء

يالله , انا الحين مدري كيف قعدت هالاربع ساعات اللي كانها سنين والحين تقولي لا جيت تعرف السالفه ههههههه والله مافيني صبر ياشباب شوي واشقق ثوبي ابي اعرف وش صار

وانطلق مثل برق بوسط الظلام , واوصل عندهم , ها بشر وش صار

قال لي , الله يطول في عمرك , يوم رحت , وزعنا الدوريات على كل الحاره وعلى مخارج الحي ايضا

وقبل كل شيء تاكدنا من رقم اللوحه ( وطلعت اللوحه مسروقه من سوناتا نفس سيارتك ونفس لونك ومواصفاتك )

يعني شكل المجرم محترف وعارف شغله زين , لانك تعرف ان بلاغ سرقه السياره ما احد يعطيه اهتمام وهي نوع محدد ومن شركة وحده ونوع واحد

فتخيل لو البلاغ عن لوحه , كم لوحه موجوده بالرياض 5 مليون لوحه !! مين اللي بيقعد يطالع باللوحات , فالحرامي عارف شغله زين

ففكينا مسامير الجنوط الاماميه , لان السياره دفع امامي , فأول ما يركبها المشتبه فيه , راح ينفك وتطيح على احدى الجهتين , وراح يدعس وراح ينفك الثاني وتطيح السياره على وجهها وما بيقدر يمشي لان الدفع امامي

فقلت تمام , وش سار طيب , قال اللي سار ياطويل العمر , انه الساعه 11 الليل نزل المشتبه فيه ومعه ورع !!

حسبي الله عليه , ايوه كمل , وقال : يوم نزل راح للسياره وركب فيها ,ويوم مشا فيها بدأت الجنوط ترج بالسياره وعرف ان في الموضوع إن فسحب جلنط ونزل على التراب وفتح الباب وشرد , يقول كان سمين , ويبغا يروح جهه العماير يندس فيها , وهو يسعى مر من جنب زباله وانا من القهر ووالله اني حسيت فيك قلت لو اقلته لكن ما يشرد , واطلق النار على الهواء , الا والمشتبه فيه نط على الارض ويقول خلاص خلاص خلاص , ويوم جيت له قال لا تطلق خلاص , >> طلع انه دعس على قزاز وشقت رجله والضاهر مع الخرعه يحسب اني طلقت عليه في رجله هههههههههههههههههههههههههههههه , لكن احسن وودي فيه

قلت كفوو بيض الله وجهك , وينه تكفى خلني اتفل في وجهه , قال راح للقسم , قلت والحيوان اللي معه , قال للإسف حط رجله واحنا ماعطيناه اهتمام لاننا نبغا الراس الكبير وهذاك مجرد طفل مايتعدا 18 سنه والله يستر علينا وعليه واصلا راح نحقق معه وبيجيب كل اخوياه ان شاء الله لا تخاف

قلت ما قصرتم الله يسعدكم

المهم طلع اللي سرق سيارتي , مطلوب من 7 سنوات للحكومه !!!!!!! , والحكومه زلبتني وكان معي مجرم هي طالبته !! شفتوا كيف

وكم من واحد زلبته الحكومه ولا دورت سيارته المسروقه , ويكون المجرم مطلوب للحكومه وبشده , والحكومه ماحطت يدها في شيء

والله لو الحكومه تجيب كل اللي يسرقون السيارات , ليتعرفوا على ناس كانوا مطلوبين وبشده للحكومه لكن لا حياه لمن تنادي

طلع الرجال راعي بلاوي ويبيع ومجرم محترف , وكان يستعمل سيارتي في الشذوذ الجنسي حسبي الله عليه

فياليت لو الحكومه تتساعد معنا , يعني لو فيه مرور عند كل مخرج عند كل نقطه فيها تجمعات , مثل اليوم الوطني , بالله ما تحس انك بامن وعافيه ولا تخاف احد يجيك طاق الطبلون ويمكن يتسبب لك في حادث مميت , لان الدوريات في كل محل منتشره بشكل لا يصدق , والشوارع ماشيه مع انه زحمه شنيعه, لكن ماشي لان في كل مكان دوريه

لو المرور كذا منتشر كان 70% من السيارات المسروقه رجعت لاصحابها , لان المرور راح يوقف ناس كثير , ويشيك على معلومات السياره , وبكذا راح نلقى مواتر كثيره مسروقه وتستعمل لحد الان لكن مافيه اهتمام , ايضا ما راح يكون فيه سرقات عند المحلات التجاريه او ماشابه , وبكذا راح ينقرض التفحيط وينقرضون هذي العينات , ونرتاح كلنا

في النهايه تقبلوا تحياتي اخوكم ابويزيد ( اسامه الغامدي ) وانتبهوا من هالنوعيات ولا تثق في احد الا لما تصادقه وتعرف كل شيء عنه







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


النظيم وما ادراك ما النظيم 


up 0 down 0
abo zed 27
قبل 2 سنه و 2 شهر



سرد القصه والاسلوب يخليك تكمل للنهايه


up 1 down 0
khaled3224 260
قبل سنه و 6 شهر