بسافر خط لمكة ارجو النصيحة ؟

حدد من وين طالع

كتبت الزمان --- وكتبت وين بتروح----بس من وين بتسافر، كيف نعرف التحويلات وما قلت من وين بتسافر. ؟؟؟؟!!!!!!!

من الرياض اخوي 

شيك على السيارة وعلى الكفرات وانتبه من السرعة وانتبه تسوق وانت نعسان
وخل عداد البنزين دائما فوق الربع

لا تنـــسَ دعــاء السفر، وتأكد من :

- الكفرات.
- زيت المكينة.
- زيت القير.
- ماء الرديتر.
- تأكد من الاسبير وعدم نقص الهواء فيه.


* لا تترك البنزين ينزل عن الثلث وأنت مسافر.


وفقك الله ورعـــاك ،،

دعاء السفر اهم شي

افحص زيت المكينه والمويه والكفرات والاستبنه 

طول مانت بالخط كل شوي شيك على الحراره والبنزين. 

الخط طويل وبينسيك هالحاجتين



لاتسرع ابدا 

اذا وصلت بالسلامة قل دعاء السفر 

بالتوفيق

ساهر المزاحمية والرويضة
وفيه تحويلة قبل ساسكو القويعية الله يسهل دربك

شيك على الكفرات والاستبنة وملاحقاتها 
شيك على زيت المكينة وموية الرديتر والمساحات 
شيك على الانوار الامامية والخلفية 
دعاء السفر ودق سلف 
لا تسرع لا تسرع لا تسرع وخاصة انك جديد بالخط وماتعرفه 
راقب الحرارة والبنزين دائما فوق النصف لانك ماتعرف مواقع محطات الخط 

وتذكر ان تصل متاخراٰ خيرا من ان لاتصل 

واذا اذنك بتمشي النهار ركب برقع عشان ماتروح الواجهة ملح 

اخوي اهم شي لاتمشي من الرياض الى مكه حاول توقف تريح تراي اول اروح امسكها مااوقف الا في مكه وهذا غلط

لكن امسك الخط خلها وناسه عشان مايجيك النوم واذا بقى على ضلم 20 هد السرعه هناك تفتيش كلاب الله يكرمكم اهم شي انزل مع السيل لاتروح مع الهدا كا

الهدا يؤثر على الاذان خاص اول مره هههههههههههههههههههههههه

السيل كله شاحنات
الهدا اقرب
والسواقة فيه ممتعه
بس ترا ساهر بيستقبلك اول ما تنزل من الجبل

اهم شي تثلاجة الشاي وتربع عالمقعده وثبت السرعه وشرطن ام اللوحات ...ايوه صح نسيت انك محرم امش على مهللك

اهم شي ترتاح وتريح الموتر كل فترة
الخطوط الطويلة تأثر على حرق الزيت وعلى القير 

مو مشكلة طول المدة اهم شي الموتر يرتاح

انا اخذت من الشرقية لجدة 19 ساعة والكل يلومني ليش طولت
اذا صدفت غبار بالطريق , غير زيت اول ما توصل

وربي يحفظك من كل مكروه

اذا بتسوق بسرعة لا تنسى تسوي حماية للواجهة

إذا بتنزل من الطائف عبر عقبة "الهدا" .. فلا تكثر ضغط الفرامل .. بمعنى : بعضهم ينزل من أول العقبة إلى آخرها ورجله على الفرامل !! وهذا يسبب سخونتها لدرجة انها ممكن تسخن وتحترق ومعد تمسك معك !!
استخدم غيار منخفض على حسب نوع سيارتك وسرعة الطريق وسهولته + الفرامل في اللفات وللتهدئة ..

وانصحك تنزل مع الهدا .. السواقة فيها ممتعة صراحة ومناظر الجبال جميلة جداً ..

وبالسلامة

ما قصرو الشباب
وازيد البرقع على السيارة مثل ما قال الاخ talol لا يصلح الا في السرعات الخفيفة لان في السفر ممكن يخلع الصدام

وايضا"اذا موترك تماتيك انزل من الهد واطلع من السيل افضل واذا عادي انزل واطلع من الهدا بالتوفيق