مساعده بخصوص شراء سياره من معرض وشحنها

شوف على حسب المعرض
مثال عماد الدين وبن وزير والمعارض هاذي اعتبر حقك محفوظ (( قصدي فلوسك بس))
اما السياره والله ونخوك كنت ابي اخذ من الرياض وتجيني شحن
بس يوم فكرت قلت يمكن يجبون لك من المعروضه عند باب المعرض
كلن ركبها وكلن شغلها وانا ويش ذنبي فيها
مهما كان مابعد تاخذ موترك شوف عينك الوكاله الواحد يخاف منها
مابالك تاخذ من معرض

وانت ونخوك بكيفك والله يوفقك ..

عشان تحفظ حقك ارسل واحد للرياض بوكاله منك وكذا تخفظ حقك احسن بعدين ماتقول راح كل شي 

أرسل أحد معارفك للمعرض معه صورة بطاقة الأحوال حقتك 
يعاين السيارة قبل الدفع و إذا الله سهل و شريت هو يستلمها و يشحنها لك 

انا اضمن لك عماد الدين

تعاملت معه ورجل يستحق الثقه


لكن ترى الوكاله يجي فيها خدوش أحياناً

لو تفحصها بنفسك أفضل

اخوي نصيحة مو مثل شوف عينك يعني الحمد لله المواصلات موجودة تقدر تركب نقل جماعي وتجي تخلص أمور سيارتك او اذا عندك احد قريب وكله بالشراء أفضل و أضمن و أحسن من تحويل المبلغ 

بالتوفيق

اخوي نصيحة مو مثل شوف عينك يعني الحمد لله المواصلات موجودة تقدر تركب نقل جماعي وتجي تخلص أمور سيارتك او اذا عندك احد قريب وكله بالشراء أفضل و أضمن و أحسن من تحويل المبلغ 

بالتوفيق

اشوف كثير من الاشخاص يمدحون معرض عماد الدين
وانهم ثقه

السلام عليكم

نصيحة تروح بنفسك وتشتري السيارة وتشيك عليها وتطابق رقم البطاقة الجمركية مع السيارة اللي اخترتها
انتبه من الثقة الزايدة وانا اخوك

لي تجربة شراء من معرض عماد الدين بالرياض واعطيكم ملاحظاتي عليهم

قبل اشتري السيارة ( نانافارا 2014 تماتيك نص فل يعني بدون مثبت ولا ارباق للراكب )
تواصلت مع المعرض وحاولت ينزل السعر حسب اعلانهم لاني ابدفع كاش
جلس يحلف لي يمين بالله إنه مدمر سعرها وعارضها براس المال ( 67 ألف ريال )
رحت للمعرض وقلت وين السيارة ؟
راح معي البائع لسيارة بالمعرض وشغلها وقدمها عن المواقف
وجلست اشيك عليها وشغلتها مع المكيف وفتحت الكبوت
وفجأة لقيت فوق راسي أحد الشباب السعوديين جاي يستلمها !!

طلعت سيارته ومشتريها ورايح يخلص الأوراق بالمرور !
تفشلت واعتذرت منه وقلت والله مادريت احسبها السيارة اللي ابشتريها
الرجال طلع محترم ولا قال شيء
أخذ سيارته وتوكل على الله

طلبت اشوف سيارة جديدة اشتريها
قالوا مافيه بالمعرض شيء
كلها بالمستودع
وكنت مستعجل ابرجع عنيزة وراي دوام بكرة
سويت ذكي وطلبت يعطيني البطاقة الجمركية وصورتها
وقلت هذي سيارتي لا تغيرها وتعطيني وحدة تختلف عن رقم البطاقة
قالوا اكيد
سلمتهم الفلوس كاش مع 1500 ريال قيمة الاستمارة واللوحات
مع 150 ريال قيمة النقل بالبسامي
ومشيت لعنيزة

جتني السيارة بعد يومين ورحت استلمتها من معارض بريدة فرع البسامي
واول ملاحظة شفتها ان السيارة ماشية 40 كيلو !!
بصراحة استغربت
كيف سيارة تمشي 40 كيلو ؟
مستحيل مشاوير طلوعها الباخرة ونزولها منها
وطلوعها السطحة ونزولها يخليها تمشي 40 كيلو
طبعا الشباب بالمعارض يلعبون بالسيارات ويتمشون عليها بالليل ويقضون مشاويرهم
فيهن علشان كذا تلاقي اللي ماشية 40 كيلو او اكثر !

المهم والمصيبة بعد شهرين ن شرائي السيارة لقيت اعلانات عماد الدين
على النافارا الفل كامل صارت بــ 63 الف ريال
وهذي كانت يوم اشتري سيارتي بـ 69 الف ريال بطاقة جمركية

والاخوان كانوا يحلفون انهم بايعين السيارة لي النص فل بــ 67 الف راس مالها علشان يجيبون الموديل الجديد !!

خلاصة الكلام
المعارض كلها شريطية من اكبرهم لاصغرها والحلف والكذب عندهم مثل شرب الماء

وانصح الجميع ياخذون من الوكالة لو كانت اغلى سعر بفرق بسيط
تضمن سيارتك على الاقل ماصارت عرض للزباين كلٍ يركبها ويفتشها
والاهم موظفين المعرض مايلعبون فيها ويسوقونها لاصار لهم مشوار قريب
وتجي تلاقي سيارتك واصلة 50 كيلو وهو مفروض اصفار !!

والله يوفقك ويسهل امرك

رجل في خريف العمر
غريب اللي صار معك من معرض عماد الدين
شوف الناس في حسابه في الموقع يمدحونه وانا راسلت كذا شخص شارين منه سيارات بدون ما يرحون للمعرض حولو الفلوس وشحن لهم السيارات بدون مشاكل