افيدوني سوناتا ... ولا هوندا كورد

السوناتا مهما وصلت من صناعه وتكنولوجيا أنا باقي أشوفها كوريه وتتهربد بعد 3 الى 5 سنين
وحتى الأكورد ماعاد هي مثل أول ، بس أفضل بمليون مره من السوناتا ...
مجرد رأي شخصي

فيكي1 : ههههههههه أضحكني رد تتهربد , شكلك من اللي يخفون بهم على طول 


المهم نرجع للموضوع 

أخوي حوران 

لو أنا في مكانك 
اخذت السوناتا 2013 لأسباب :
- قطع غيار رخيص 
- سعرها مناسب 
- موديل موب قديم

اما الاكورد مانختلف عالجودة لكن موديل قديم 

وعلى فكرة خذها من شخص استخدم السوناتا 

الموتر وبكل اختصار ممتاز 
طبيت فيه البحر 
وطعست وووو وسويت فيها كل شي 
وماشاء الله تبارك الله تحملت ولا كن فيها شي 

وقبل شهرين تقريباً بعتها 
ماشاء الله تبارك الله 

فـ انصحك بالسوناتا 2013 

والله يوفقك وييسر أمرك ^_^

أنصحك بالسوناتا 

ارجح لك السوناتا اولا لان فرق الموديل 4 سنوات وثانيا قطعها رخيصه وثالثا عمليه ورابعا والاهم مواصفاتها حلوه جدا بالمقابل الاكورد عمليه واعتماديه اكثر لكن القطع غاليه شوي والموديل قديم

السوناتا 2013 طيبه داخل المدينه و لكن على الخطوط
غير ثابته بعد سرعه 120 يلعب بها الهواء
يعني مثلها مثل ( الاكسنت ) 
الموتر يعيبه رساوته ، أخذ الكلام من مجرب 

السوناتا بصراحة افضل كموديل حديث وبتحصلها ماشيه قليل واخت الجديدة


الاكورد تعتبر قديمة واقل وحدة بتحصلها صافقه فوق 200 الف حرام بيني وبينك


السوناتا فيها عيب بسيط من وجهة نظري اذا كان ما يأثر فيك ممكن تاخذها


اللي هو خفتها الموديل الجديد من 2011 حتى 2015 الدفعة الاولى بديها خفيف وطارتها خفيفة وتلعب شوي مع الهواء في الخطوط لكن وسط البلد ممتازة وجداً عملية


اذا انت حريص على الرساوة وتبي عزم افضل وشكل اجمل من السوناتا والاكورد ، خذ كادينزا ولا ازيرا ترى تحصل بالمبلغ اللي معك 2012 بالراحة


تحياتي لك

دورلك سوناتا 2009،2010 نظيفة احسن من الشكل الجديد

طيب ياعيال انا ناوي هالايام ع سوناتا 2011 مافيه حل تزود الرساوه ولو قليل لان سرعتي اعلى شي 160 ماتعداها
واخونا الي فوق يقول حدها 120 عقب يلعب فيها الهواء

بعدين على قد ميزانيتك وخدمية

ياشباب اللي كانت معي قبل موديل 2009 

ورساوتها مش بالدرجة السيئة اللي متخيلنها 

محد راح يقنعك بالرساوة الا لين استاجرت لك وحدة وجربت بنفسك 
تشوف هي تناسبك والا لا ^_^

أنصحك بالسوناتا بس موديل 2010 أفضل من الشكل الجديد بكثييير من ناحية وزن ورساوة
ولو تاخذ إستخدام إمريكي و 6 سلندر عز الطلب - فيها 10 ايرباقات وأنظمة أمان كاملة

الأخ بندر لمعلوميتك ترى السوناتا القديمة أثقل وأرسى من الجديدة بمراحل وخاصة الـ 6 سلندر لإنها أنزل للأرض 

يا بندر 99 حنا نقصد ان 2009 والموديل القديم ارسى من الجديدة

انا كانت معي 2006 والله في عز الهواء اشد بها الخط ماشاء الله الموتر في يدي ، اللهم اذا شطفت تريلة وانا على 160 طق الهواء في البدي وتتحرك شوي وهذي طبيعية في اغلب السيارات



لكن بصراحة جربت الكامري موديل 2007 والموديلات هذي ما تجي نفس رساوة السوناتا القديمة


لكن الجديدة ترى اذا كان فيه هواء قوي او شطفت تريلة مجلعد شوي تتحرك لكن مهب معناها تلعب كل وقت لا عادي


انا وصل بها 200 موديل 2012 وماشاء الله في يدي وماخذ المنعفط وانا مرتاح بس نقول في الهواء القوي والخطوط


اتمنى وضحت الفكرة لك يا بندر 99 و مطيري 305 بحكم انك تسأل عن رساوتها اتمنى افدتك


ترى مهب لهدرجة سيئة لكن انا عشاني جربت القديمة ف حسيت بفرق

تحياتي لكم

يا أخ بندر
تبي تقارن السوناتا بالأكورد ؟؟
صاحي انت ؟؟؟؟؟؟

يعطيكم العافية وماقصرتو 

طيب لاحظت في السوناتا فيهم يجي استكر سوناتا على الدبه يمين وفيهم يجي على الدبه يسار وش الفرق بينهم 

رساوة السوناتا تعتمد بشكل كبير على الجنوط، جنوط الستاندر (الحديد) رساوتها اقل من ال 17 وال 18 بكثير 
جربت جنوط الساتندر وجنوط ال17 وفيه فرق حتى فالملفات على سرعات عالية 

الاكورد ما سقتها لكن ركبتها ومراتبها غير مريحة مرة والباقي يفيدونك الاخوان 

اكورد ااذا ماتبي موتر يطلب ورشات

يا حوران السوناتا ٢٠١٣ الدفعه الثانيه و فوق الين ٢٠١٥ الدفعه الاولى هذي كلها تجي علامة سوناتا فقط على اليسار وهذي تعتبر الفيس لفت حق ذا الشكل لان السوناتا ٢٠١١ الى ٢٠١٣ الدفعه الاولى الشكل الاول  ،، ثم حدثوها غيرو مرايات والداخليه والشبك الامامي والكشافات والشمعات الخلفيه للفل والنص فل صارت ليد كامل  بموديل ٢٠١٣ الدفعه الثانيه و ١٤ و ١٥ الدفعه الأولى  وهي اللي فيها سوناتا على اليسار بدون كلمة هونداي على اليمين...، ان شاء الله الشرح وافي ،، والسوناتا معي ٢٠١٤ طيبه ما شاء الله ولاكن رساوتها لك عليها وقت الهواء اما الاوقات الثانيه ماعليهاا ممتازه.  

تسلم ي البروفيسور