كم تسوى هونداي ألنترا ؟

السياره الي ماتناسبك قفل الصفحه واطلع ماله داعي تتضارب مع ذا وتكذب ذا

اماالاسعار تختلف 2012 من 27الف الى 55الف جديده موديلات 2015 حسب الموديل والنظافه والفئه

والله انا مثلك
واستغرب من الاسعار ماهي بعيدة عن الجديد
صارت مثل سوق الجوالات

حتى دخلت موقع الاجانب الي يبيعون فيه سياراتهم
الي رايح خروج وكذا
نفس الشي اسعار غالية

شي طبيعي اذا نوى الشخص يبيع سيارته بيحصل ناس
كثير برا الموقع ومن الحاره ومن العمل صاملين ويبون
الموتر ﻻنهم ياخذونه من معرفه اصابعك ماهي سوى 
ومب كل واحد قال كذا يعني كذاب صف النيه وبيرزقك
ربي .

ان شاءالله وانا اخوك النية صافية والله يرزق الجميع
يعلم الله كلامي موب حسد يربحون ولكن الله ماشفناه يا جماعة الخير .. بالعقل عرفناه
اذا الوكالة تبيع 2015 بسعر 51 الف وتدخل موقع حراج تلقا نفسها ماشية الف كيلو ويقول لك مسيومة من رجال صامل بـ 50الف !! 
انا بس ابي تصححون لي الخطأ الي براسي (( بذمتكم هل تشترونها بهالسومة او تزيدون عليها ؟؟ )) يعني لهالدرجة يعتبرون الشعب بقر لا يفقهون شي ؟
يا اخي حتى لو جيت ببيع موتري بكون صادق ونيتي صافية وبقول انا شريتها وكالة بكذا والسوم عليكم .. والطمع يضيع ما جمع والدليل ان نص سياراتهم متعلقه على شهرين وثلاث وبعضها كملت 7 شهور على سومة رجالن صامل قبل 7 شهور

اخوي ( سعمران افندي ) 
كلام العقل نص الشراء .. لو اجيب لك 2012 مرشوشة وانا شاريها اساسا بـ 45.500 وكالة على وقتها والأن ماشية 100 الف كيلو .. هل تشتريها بالـ 30 الف ؟ او خلنا نقول هل تدفع فيها 27 الف ؟
بقول لها فيها رفرقين امامية وكبوت والصدامات مرشوشة وكلها على نظافة !!!!! انت لما تفكر فيها ما عندك احساس تسأل نفسك تقول وين النظافة الي انرشت عشانها ؟؟؟ السيارة مبقعه من كل جهة !

ولو افترصنا ان هالرجال الصامل سامها بـ 30 .. الفرق 21 الف وتاخذ مثلها اصفار ما طقتها فرضة اسنان 
ولو قلنا الرجال الصامل جاره والا قريب له ، يمكن مثل ما تقولون يعرفه شخصيا وسامها منه بـ 30 ! طيب يا اخي بعها لجارك او صديقك في عملك واعرف انها ما تجيب لك اكثر من هالسعر بالسوق ولا تزعل من سومات الناس في الموقع
كل شخص يسوم بخراجه وبالي يشوفه مناسب .. وان ما طاعك السوق والا طعه 
اما يجبرني انها انسامت من رجال صامل بـ 30 وانا اعرف سعرها بالسوق ما تتعدى 25 واذا قلت له هالكلام يدعي عليك ويقول انه بخس بحلاله !! هذا انسان ماعنده مروه ولا يعرف وش يعني البخس .. لو اقول له بت 10 الاف صح هذا بخس اما دامني تعديل 15 الف فهذا باب السوم 

الله يهدي الجميع 
واليوم بنزل السوق ادور .. وان ما لقيت ما لي الا الوكالة واريح مخي من السيارات المهربدة 

وترا موضوعي للنقاش العام يعني راعين الديس لايك اتوقع ماعجبهم الكلام لأنه مضره على تجارتهم .. بس خلونا منطقيين معليش

انا كنت ابي اروح الحراج اليوم اشوف الاسعار
بس صار لي ظرف
بالله ان رحت رد لي كيف اسعار الالنترات من ١٢-١٤

الحين عليها عرض تأخذ النترا تجي معها اكسنت بشنطة هههههه

shalan 

لقيت النترا 2013 يقول مسيومه 27 فيها باب يمين ورفرف يمين مرشوش ( تجميلي ) عاد مدري وش سالفة تجميلي ولكن يقول حده 33

ايضا لقيت النترا 2014 فيها رش في باب الشنطة فقط ، ورش في رفرف يمين امامي وكبوت ورش صدام امامي .. نص فل مكينة 1800
وابشرك شريتها اليوم لولد اختي بـ ( 34 الف ) نشب لي فيها يبيها ..  وبكرة مسافر عليها ينبع عشان دوامه

اليوم انقلب راسي وشكلي بترك الدفع الأمامي واحول على الجينسس 2012 و 2013 اشوف اسعارها بالسوق حليلة 


ابو فايز 1111
عطني معلومات اكثر اذا سعرك مناسب شريت
مابيها نظيفة ابي مرشوشة للدوام .. اهم شي مكيف ومحركات ما تشغلني


ونصيحة يا شباب الي بيشتري ينزل السووووووق  ياخذ له كوب شاهي وموية صحة  يلف براحته وبتلقون اسعار نص قيمة اسعار موقع حراج
هنا ماعاد فيه الا مبزرة رافعين اسعار سياراتهم تقول انها وكالة وهي درادع

اليوم بعد لقيت سوناتا 2014 ستاندر عليها سوم 44 الف ماشية 22 الف كيلو والرجال يبي يبيع .. عيوبها المراية الي عند السائق مكسورة 
ولقيت سوناتا نص فل موديل 2015 لون عنابي غامق او بني نص فل ( جنوط وكشافات ) .. ماشية 25 الف كيلو مسيومه 50 الف ريال  والجرال حده 60 يقول 

والله يعينا على سفهاء موقع حراج وخصوصا اصحاب الديس لايك الي ماعجبهم موضوعي .. لكن الصراحة زينة في البيع يا راعين الديس لايك 
ولا همني تقييمكم ولا له اعتبار عندي دام ما تعبترون المسلمين
ونصهم يقول لك للأمانة عشان يبري ذمته ثم يذكر عيوب سيارته وبعدها يطير سعرها سما .. امحق امانه دامك عارف موترك خجم وترفع سعره وين امانة البيع وما بقى على سعر الجديد الا خطوتين !!

تصحيح خطأ :
(( ماشية 25 الف كيلو مسيومه 50 الف ريال  والجرال حده 60 يقول  ))
ماشية 25 الف كيلو مسيومه 50 الف ريال والرجال حده 60 الف