بعض المشاكل في سوناتا 2008

الرجة ماني متأكد يمكن من الكراسي التشغيل شيك ع الدينمو واصابع البطاريه واخر شي شيك عليه السلف

تدق سلف بس ماتشتغل صحيح   اتوقع السياره تحتاج تصفيه مكينه وتشيك على بخاخات وبوابه الهواء ثروتيل وحساس 

شيك على سير التيمن والشداد ممكن يبي له وزن .

الله لا يهينكم إخواني و ألف شكر لكم

المعذره بعلق ع كلام الاخ نبيل سير التيمن وش دخله تبي تدخل الرجال بمتاهات مالها نهاية؟ سير التيمن ماتخرب وزنيته من حالها
اما اينقطع والا يطلع صوت
واذا انقطع المكينة تروح
اتمنى ماحد يفتي ويدخل الرجال بمتاهات ماترضاها لنفسك ي اخوي

اطلع للورش وعلمنا وش قالو ماينفع كذا هنا كلام نظري لازم فحص على الواقع 

اشتهر موضوع السير التايمن كل واحد يقولون له بالموقع سير تايمن 
هذاك شئ وموضوع الرجاجيل شئ الله يهداكم بس
شيك على فلتر الهواء ونظف البخاخات واشتغل فيها مزبوط ونظف كل شئ له علاقه بتوصيلات البنزين 
بعد كذا من دقه بتشتغل

جاسم 12 \سير التايمن لو ماكان موزن السياره ماتشتغل الا بصعوبه ,,,وصاحب الموضوع يقول فيه رجه اكيد الرجه
من كراسي المكينه ,,,كله مرتبط ببعض اذا خرب كرسي المكينه يخرب عليك اشياء كثيره لازم تكون المكينه ساكنه بدون رجه ولا
\راح يخرب عليه اشياء كثيره ,,, هذا راي وهو راجع لصاحب الموضوع .

شوف يا اخوي مدام انت تقول تحتاج عشان تشتغل تحاول 3 مرات
ركز في العداد قبل تدق سلف شوف علامة المكينة بتطلع في العداد قبل ما تشغل يعني على دقة السويتش قبل ما تحاول تشغل شوف العلامة حقت المكينة الصفراء بتطلعلك

ثاني شئ
أفحص حساس الكرنك أو غيره
اذا فيه زيوت مهربة عليه مسحة وركبة ثاني مرة وهوا مكانة تحت الكومبرسر تقريبا أو بالأصح قريب من صوفة المكينة تحت 

لاحظ دائما يكون الخلل من الرجة وصعوبة التشغيل السيارة يكون الخلل من الكرنك أو واحد من حساسات الكرنك

اضن السوناتا 2008  تجي جنزير وجنزير مايتغير  

 بنسبه لحساس الكرنك لو خرب ماتشتغل السياره  لو تشغلها من هنا لبكره خلاص اذا خرب خرب 

كل أرائكم و نقاشاتكم محل تقدير و إحترام و إستفدت منها كثير ، و بإذن الله بوافيكم بالجديد لا رحت ، ألف شكر

الي عطاني دس لايك لو راقل تعال ناقشني بموضوع السيارات ادري مافي راسك الى الدجه و دس لايك مافكرت فيها ترا  بس اعلمك وجه نظري لا انت ولا غيرك


 الي ابيه  تجي وتناقشي بموضوع السياارت وانا ادرسك  ه

عزيزي نبيل افهم قصصدك وانا من الناس اللي ذاقوا مشاكل التيمن صدقني التيمن تشتغل السيارة وتحسها تناتع معك تحسها تروح ورا وقدام كانك مشغلها بالاول بدون ما تدق كلتش وترج بشكل ملحوظ وماتطول معك الا وهي مخبطه ينفرط الشداد من محله او ينقطع السير
انا جربت سير التيمن ومشاكله مشكلة الاخ مستحيل تكون سير تيمن

هههههه سكودر أنا عطيتك بالغلط يالغالي ، حاولت أعدلها يقول ما تقدر تقيم مرتين ، بكرة باذن الله بعدلها لك و أعتذر لك

شرواك لاعادي يارجال هههههههههههه لكن فيه واحد ممتحني من البارح 

وعليكم السلام ورحمة الله وبركاته 

المشكلة الأولى : هذه مقدمات , الطرمبة على وشك يبغالها تغيير هي وصفاية البنزين وسبق مرت علي المشكلة بالسوناتا 
وفي إحتمال أيضاً أنها مشكلة سلف.

المشكلة الثانية : كراسي مكينة وسبق مرت علي أيضاً وتم تغيير الكراسي وأختفت الهزة 
أهم شيء دور لك مهندس ممتاز يركبها ممتاز وأشتري كراسي أصلية. 

موفق خير 

السلام عليكم

بالنسبه لتشغيله ثلاث مرات

اذا كان فيه صوت السلف قوي  فمعناته تشوف اصابع البطاربه ممكن مصديه اول خربانه
اما اذا كان الصوت لك عليه ماهو ذاك  ف  هو السلف والحل لاتغير السلف جديد فقط خله يغير الفحمات والنحاس حقها وماتكلفك مبلغ كبير في ال100 الى 200 مع التركيب
 
(((رد احد الاخوان ب الدينمو 
الدينمو ماله شغله في لحظه تشغيل السياره
بعد تشغيل المكينه اذا كان الدينمو خربان وقتها ماتمشي السياره دقيقه واقل وتطفي الين ماتخلص الكهرب من البطاريه وذا ماياخذ وقت  بالثواني)))

اما الرجه المكينه فهي على حسب ياخوي 
اذا كانت الرجه بالمكينه خفيفه وتشوفها لما تفتح الكبوت فهذي مشكله اوساخ ويبيلها المكينه تنظيف وفلتر الهواء وحساس الهواء كذلك 
اما اذا كانت الرجه من المكينه لكنها توصل لداخل السياره وتحرك اذا وقفت عند اشاره بالذات وترج معاك على المشي بعد  فهذي سلمك الله كراسي المكينه 

السوناتا 2008 الشكل القديم تجي جنزير


وبالنسبة للرجة يمكن الموتر يبي له كراسي يمكن تفتفه يبي لها بواجي وتصفية شاملة


التشغيل ممكن الاصابع عندك محلية او الصفاية عندك باديه تتسدد الاسباب واجد ولا يكتشفها لك الا الميكانيكي بعد الفحص اما من خلف الشاشة صعب الحكم على السيارة وحنا ماشفناها ولاندري عن حالتها الراهنه لكن في الغالب هذي الاسباب


وكلها ان شاء الله بسيطة وقطع استهلاكية وترجع السيارة مثل ماكانت




بالتوفيق