أضف سؤال أو موضوع جديد          

موقفي قبل قليل مع صيانة الناغي

up 16 down 2
abdullahalharbif15 754
قبل 6 سنه و 4 شهر




بسم الله الرحمن الرحيم 

اليوم كان اول دوام للناغي بعد اجازة الحج 
وانا سيارتي جينسس .. وصيانتها VIP على كلامهم 
بمعنى ما انتظر دور .. ولا احجز موعد 
الفرع يفتح الساعه 8 .. قعدت عند الباب 7:45 .. انتظرت الى ما فتحوا الباب ودخلت على السكيورتي 
قلتله معي جينسس وبسوي صيانة ال20 الف 
قالي استريح واذا جاء الموظفين دخل السياره الصيانه 
انتظرت تقريبا ربع ساعه وبدأو الناس يجون وما جاء الموظفين
رحت للسكيورتي وقلتله وين الموظفين . .قالي اصبر شوي
قلتله طيب عندي كم مشكلة بالسياره قالي لازم يطلع معك المهندس اولا وبعدها نشوف قلتله اوكي ابي المهندس .. عطاني رقم وناداني بعد 5 دقايق




وطلع معي المهندس جنسيته هندي .. وما يتكلم وعصبي
نرفزني الصراحه 
قلتله عن كم مشكلة بالسياره .. منها ان النور اليسار نازل على تحت بسبب حفره قوية اخذتها
وقلتله عندي حذفه يمين ووريته الحذفه 
وكلها كان يسجلها بالورقه 
قلتله عندي صوت طقطقه بالدركسون لما الفه يمين ويسار (( احيان يطلع الصوت واحيان لا ))
قالي سمعني .. اخذت لفه ولفيت الدركسون وما جاء الصوت .. وما رضي يكتبه بالورقه 
قلتله ليه ما تكتبه .. قالي مافي صوت .. قلتله طيب انا سمعت الصوت وجاني كثير 
قالي خلاص ندخلها الصيانه ونسوي كشف كامل 
نزلت ورحت للسكيورتي مع المهندس .. وراح قالي لازم تاخذ موعد 
وعطاني موعد بعد 7 ايام 
كان وقتها الساعه 8:40 تقريبا 
وموظف الجينسس للحين ما جاء .. والصيانه مافيها ولا سياره والعالم تنتظر 




طبعا موجودين موظفين السبارات الباقيه
بس موظفين الجينسس مو موجودين
انتظرت الى الساعه 9 انا واحد الشياب عنده مشكلة الكفرات موديل 2015 وجاي عشان الاستدعاء
كلمنا السكيورتي قلنا له لنا ساعه ننتظر وش السواة
قال ادخلوا هناك ... واشر على مكتب فيه احد الاشخاص ببدلة رسمية رماديه من احد الجنسيات العربيه 
دخلنا عليه انا والشايب
والشايب تكلم 
قاله انا جاي عشان الاستدعاء .. قاله عطني الاستماره عطاه الاستماره 
راح قاله الموظف السياره راح تقعد عندنا 4 او 5 ايام 
الشايب قاله انا جاي من الباحه وما عندنا فروع هناك وراجع لها بعد يومين 
قاله الموظف ما تقدر تخلي السياره عندنا ؟ .. الشايب قاله لا 
بعدها الشايب قاله طيب ما تعطوني سياره بديلة ؟ .. الموظف قاله لا ما نعطيك
انا تدخلت هنا وقلتله الوزارة تقول انكم تعطوه سياره بديلة !!
قالي ما عندناش سياره بديلة .. قلتله اجل تعوضوه بقيمة الايجار 
قال محنا معوضينه .. قلتله هذا نظام الوزاره !!
راح الشايب قال اجل ببلغ الوزاره .. راح الموظف عطاه الاستماره وقاله روح بلغ يا عم ربنا يوفئك 
قاله يعني ما تبون تخدموني ؟ .. قاله لا مش عاوزين 
الشايب خاف وقاله لا لا خلاص بجيب لكم السياره بكرا واخليها عندكم 
ومشي الشايب
راح الموظف قالي : وايه عاوز انت ؟ عاوز تبلغ الوزاره وتسجل بلاغ ولا ايه ؟ 

طبعا انا انسان بارد ونادرا ما اعصب 
قلتله جاي ادخل سيارتي صيانه ال20 الف 
قالي ما عندنا صيانه !! .. قلتله كيف ما عندكم صيانه وانا مدخلها عندكم صيانة ال10 الاف
قالي ايوا زي ما انت شايف ما عندنا روح فرع التحليه 
قلتله اجل ليه فاتحين فرع كبير واخر شئ ما عندكم موظفين ؟ 
قالي كذا حنا ما عندناش حاقة .. قلتله ماني جاي اتشحذكم تدخلون سيارتي
انا دافع فلوس وانتم قايلين صيانه VIP وتدخلوني سيارتي
قالي وحنا برضوا ما نتشحذك ومش عاوزين منك حاقه 
قلتله بس انا بدخل سيارتي ولا الوزاره بيننا
قالي بلغ الوزاره .. قلتله اوكي وطلعت من عنده ورحت للسكيورتي
طبعا انا هنا عصبت
قلت للسكيورتي خويك هذا امسكه عشان لا يتلطم .. ترى لسانه طويل
طبعا رفعت صوتي عشان الناس بالفرع تسمعني 
قالي السكيورتي وش في ؟ .. قلتله خويك يقولي ما ندخل السياره عندنا وروح فرع التحليه ويقولي ما عندنا صيانه 

راح قالي السكيورتي : طيب حنا ما عندنا صيانه

قلتله كيف ما عندكم صيانه وانا مدخل سيارتي صيانه ال10 الاف
راح قالي وش اسويلك ولف راسه وطنشني
طلعت جوالي وادق على وزارة التجارة 1900 .. وارفع بلاغ قدامهم 
واروح اركب سيارتي 
ويجيني الموظف اللي من الجنسية العربيه ويقولي تعال تعال دخل سيارتك 
وانزل ويدخلني المكتب حقه .. وياخذ استمارتي وهو بنفسه يدخل سيارتي على صيانة ال20 الف
وقام بنفسه واخذ الورقه واعطاها موظفين الصيانه 
ودخلت السياره وانتظرت .. بعدها جاني الموظف وقالي عندي خبر مش حلو للاسف
قلتله وش في ؟ .. قالي فتلر الزيت مش موقود عندنا للاسف
قلتله طيب ؟؟؟؟ .. قالي تعال الساعه 2 .. قلتله وبيكون موجود ؟ قال ايه
قلتله زين زين ومشيت 


طبعا بلاغ الوزارة مكتوب الان ( جاري التنفيذ )

وبروح للفرع الساعه 2 وبشوف وش بيسوون 




واذا صار اي شئ جديد بالموضوع 




راح احدث الموضوع واكتبه







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ماينفع معهم الا العين الحمره


up 0 down 0
abdullah-0088 11
قبل 6 سنه و 3 شهر



ربي يوفقك رفعت راسنا لانك بلغت وما سكت عن حقك ياخي اموت بالناس الى تطالب بحقها 
وفي مثل يقول لكل مطالب وراه حق وقهر اشتري سياره بمبلغ وقدره ويجي واحد يقهرني بحلالي وما يخدمني 
الزمن ذا لا تكون طيب ابدا ابدا خذ حقك من فم الاسد بس بالنظام والقانون واحلى شي المحامين يطلعو حقوقهم بالقانون 

موفق وطمنا عليك بالله ضروري وش صار 


up 0 down 0
فـهـــــد الفهد 449
قبل 6 سنه و 3 شهر