الرفاعي والمصري وتفاصيل النصب حياكم

39 8

لايمكنك التصويت حتى الحصول على 20 نقطة على الأقل
إضغط هنا للإخفاء

الرفاعي33 13917
قبل 8 سنه و شهر

السلام عليكم ورحمة الله وبركاته.

اسعد الله اوقات جميع الاعضاء بكل خير،،،،،،

كيف احوالكم وكيف المنتدى معاكم 
اول شي اعتذر عن انقطاعي بالمشاركات والمواضيع 
حصلي بعض الضروف والحمدلله عدت على خير

واشكر كل من سئل عني عن طريق الواتس والخاص والاتصال؛؛؛؛؛؛
حبايبي كثروا النصابين والي مايخافون الله 
ويبيع ذمته عشان وصخ دنيا 
السالفه وما فيها ،؛،؛؛،؛،؛
معي مبلغ 35الف وعيني على سوناتا 2009 او 2010
امريكي 6 سلندر فل الفل مكينه 3.3
توكلت على الله وقلت بابدأ بالطايف 
اذا ماحصلت في الطايف بروح لجدة

روحت لطايف واخذتها معرض معرض وصالة صالة
وماش ماحصلت الا سعودي 4 سلندر
وال4 سلندر مايخارج معي 
عيني على ال6 سلندر
قلت مالها الا جدة ام الرخا والشدة::::::::

وعلى الصالات حصلت جمرك نظيف بس غالية
اقل وحدة حصلتها 2010 لون ابيض ماشية 123 الف ميل
سعرها 40 الف 
ولو معي ال40 الف ماخليتها ولا لحظة
ومن مميزاتها ///////
ستارة خلفية
لون ابيض
مكينه 6 سلندر 3.3
شكمانين 
جنط 17
تحكم كامل من الطارة
فتحة سقف
مكيف لمس
زنون في الواطي وكالة
شاشة وكالة
مراتب جلد 
مراتب كهرب
تسخين مراتب
نضام صوتي كامل انفينتي
نضام كامل ايرباق جوانب وخلفي وامامي.......

والكثير من المميزات ماتصف جنبها بشي السعودي
المهم حاولت يعطيني ب35 الف ورفض 
من اخرها 40 الف
تركته ودورت وحصلت وحدة مع مصري
لونها تفاحي 2009 امريكي
بكم يالطيب قالي ب38 الف
قلت حبيبي معي 35 الف اذا موافق توكلنا على الله
قالي من الاخر ب36 الف
والموتر نضيف واستخدام زميلي طبيب 
ومن هالعلوم 
قلت تم 1000 زيادة مابتفرق معي 
اخذت الموتر وقلتلة شوف اذا طلع بالموتر شي 
تتحمل قيمة الفحص 
قال ابد الموتر نظيف وانصحك لاتخسر نفسك قيمة الفحص
وانا رايح خروج نهائي ولو ماني مسافر مابعته
المهم انا شكيت في الوضع 
الرجال يحاول يقنعني مافحص 
وحلفانه كثير 
وانا بيني وبينكم الرجال لاكثر حلفانه مارتاحلة واشك في وضعه
المهم اصريت على الفحص 

قالي خلاص فية واحد شغلة نضيف بوديك له ورخيص يفحص كل شي ب100 ريال
هنا شكيت كثير وقلت شكلة شريطي 
المهم قلت لا انا اعرف واحد 
قال فين مكانه 
قلت امش معي واوريك مكانه
رحنا الفحص طبعا اعرف راعي الفحص من زمان فلبيني
لما وصلنا تغير وجه الاخ المصري
قال هاذا مايعرف يفحص ونصاب 
قلت وش دراك شكلك شريطي في المعارض
قال مش حكاية كذا بس هاذا مايعرف يفحص
قلت ابد مابفحص الا عند هاذا
دخلناها الفحص 
رفعها الفلبيني 
وفك البطانه الي تحت المكينه 
وهنا المصيبة الموتر مضروب ضربة قوية على الزاوية اليسرى
ومعدله الشاصية ومغير صدام وكبوت ورفرف يسار
هنا المصري ماعاد يجمع حرف واحد
قلت اخس يالنصاب اجل استخدام طبيب
وربي قيمة الفحص مايتحملها الا انت
قالي والله معي الموتر مافية شي ونضيف
وبنقصلك في السعر
قلت ابد لو بريال ماشريته 
وصدقني كنت شاك فيك من كثر ماتحلف انك نصاب

تدرون وش سويت طنشته وتركته 
ودقيتها كعابي الى موتري ومشيت
ولا دفعت ريال من قيمة الفحص
هاذا الي حصل معي 

لاكن لو واحد غيري مسكين وصدق هالشريطي
ومشت علية 
يعني الشغلة ماهي شغلة تغيير صدام
ولا صدام مرشوش 
الشغلة شغلة موتر مضروب ضربة مو بسيطه

هنا اقولكم انتبهوا انتبهوا 
والله لو يحلفلك بالمصحف لاتصدق
اخسر 200 ريال وافحص ولا تخسر شقا عمرك
والشريطي ماعندة ذمه ولا عندة مشكلة
يحلفلك بالمصحف واعيالة 
لاجل يمشي بيعته والضحية انت يالمسكين
واي فحص يوديك له الشريطي اشرد وانتبة
تجمع شقا عمرك ويمشيها عليك الشريطي
المهم اني ياخوان بحاول اتسلف 5000
هالاسبوع واكملها على ال35 الف
وباخذ 2010 الي حصلتها جمرك 
وافتك من نصب الشريطيه
اعذرووني على الاطالة
حبيت اكتبلكم ماحصل معي بالتفصيل
وشكرا للجميع 
اخوكم الرفاعي33

إبلاغ

الردود