الغوا علي ضمان سوناتا2016

وعليكم السلام ورحمة الله وبركاته 

كم ممشى سيارتك بالضبط الآن ؟ 

ممشاها ١٤٩٩٠ توها ماكملت ١٥ الف 

مهب علي كيفهم بلغ التجارة

المشكلة توني داخل موقع وزارة التجارة كاتبين اذا بتسوي الصيانة خارج الوكالة احتفظ بالفاتورة

مالك إلا حل واحد وإن شاء الله انك ما قلت لهم انك غيرت بدبي 
الحل إنك تروح بترومين وتخليهم يغيروا الزيت وخلي العامل يطبع لك الفاتورة بالتاريخ والممشى اللي كنت ماشيه 
وحتى لو تعطيه مبلغ عشان يضبط لك الورقة مثل ما تبغاها , صحيح انه تحايل ولكن ما تقدر تاخذ حقك إلا بهذي الطريقة للأسف.
نسيت اضيف نقطة قلت بترومين لإنه مركز معتمد عندهم عكس البنشر اللي قد يكون سبب لإصطيادك في الماء العكر.

الله يعينك

بسبطه رجع العداد ورح لهم 

ارفع شكوى لوزاره التجارة 

سهله اخوي جيب فاتوره من محل غيار زيت ونوع الزيت والسيفون واكتب اصلي
اهم شي تاريخ الفاتوره ما يكون نفس التاريخ الي كنت مسافر فيه

انا اشوف انه مادام الصيانه لحد 20 الف فقط انك تتركهم لان الشغله ماهي مستاهله كل هذا التعب اما لو كانت الصيانه لحد 60 او 100 الف هذه فيها كلام ثاني

حصل لي نفس مشكلتك ب الضبط وسحبت عليهم ورحت للمجدوعي واخذت موعد ووقتها قلت للموظف بدخلها صيانه ٦٠ الف مباشرة وبعدها عطيته الملاحظات

انت شكلك قلت لهم انك تشتكي من حاجه بالموتر من دون ماتذكر انك جاي عشان تسوي الصيانه الدوريه ؟ كذا انت عطيتهم مجال انهم يتهربون منك ويلغون ضمانك 

انت جرب رح لفرع ثاني للوعلان غير اللي الغو ضمانك وقلهم ابي اسوي صيانه ١٥ الف وسجل الملاحظات ؟ اذا مانفع رح للمجدوعي 

وفيه حل ثاني .. دام موترك ماوصل ١٥ الف رح لأي فرع للوعلان ولاتجيب طاري صيانه ١٠ الاف وانك غيرت الزيت برا نهائيا 

خلهم يحسبونك مازلت على زيت ٥٠٠٠ بدون تغيير ؟ اذا سألوك قل لهم وش دراني احسبكم مغيرين زيت يمشي ١٠ الاف مادريت انكم حاطين ابو ٥٠٠٠ ؟ 

وقلهم هذي اول صيانه اسويها عندكم والخطأ خطاكم ليش ماوضحتو لي 

يالبى ابو جميل بس صيانه ل ١٠٠ الف تجي باي وقت ومايلغون الضمان سواء غيرت برا او لا 

علشان كذا تشوف مبيعات تويوتا واجد بسبب خدمة الوكيل

يا اخوي انا اذكر قرأت قبل كذا قرار أن الوكالة لاتلزمك بتغير زيت الماكينة بمكان معين 
يعني كلام اللي فوقي مظبوط لكل الوكالات يمديك اتدخلها صيانة بالضمان وبالنسبة لأحضار الفواتير المقصود به الصيانات الميكانيكية وليست غيار زيت 
وصلها لوزارة التجارة

لاتصدقهم وضمانك ماشي الى 100 الف او 5 سنوات 

انا ماقد سويت صيانه للكادينزا ورحت الشركة وهي ماشيه 60 الف وغيرت البطانات وعلى الضمان ولاحد جاب طاري الصيانه

ولد خالتي معه نفس السياره وراح على 80 الف وغير بطانات وجلد الطبلون وجلد مسكات الابواب ولا سالوه عن الصيانه 

انت ودها الشركه وهي بتقبلها 

طبعا الشركات ماتكسب الا من صيانة العشرات لانها اضعاف السعر 

اما 5 الاف و 15 و 25 و35 وانت ماشي فهي تشييك بالنظر وتغيير زيت وفلتر فقط لاغير 

لاتشيل هم ضمانك في الاصل ضمان مصنع وليس ضمان الوكيل 

واذا بتسحب عليهم استمر مع بترومين اكسبريس وانتبه لحاجتين تجنب فلاترهم والزيت الثقيل 

طبعا بترومين اكسبريس معتمده للشركات ولوزارة التجاره 

موفق 

ترا ضمان تغيير الزيوت ابو كلب زيهم الوكلاء يدورون شي ياكلون حق العميل فيه

جبلهم فاتورة مزورة 

ورح لفرع ثاني للصيانة 

او رح الفرع نفسه لكن شف لك موظف غير الي قابلته 

الفاتورة المزورة تقدر تاخذها من بترومين 

والطريقة انك تشتري الزيوت والسيفون وتاخذ فاتورة وتخزن الزيوت عندك او تبيعها 

كلم الشركه الي بدبي قلم يرسلون لك القاتوره فاكس وﻻايميل

خويي مطلع النتترا 2015 وسوا عندهم صيانه الى 20 الف وسيارته فيها صوت بدوده وراح لهم وقالو وين صيانه 30 40 50 60 الف ماجيت راح عليك الضمان ونصحته يبلغ 

روح بترومين اكسبريس 

في الصباح بتلقاه فاضي 

خله يعطيك فاتورة انك ماشي 10000 الاف كيلو واذا عيا عطه بخشيش ولا تخليه يغير زيت ولا شي

وريح موترك اسبوع وروح للوكيل حقك وعطه الفاتوره ابو عشر الاف وراح يعتمد الفاتوره غصب عنه 

عشر ايام رحت مكه ونجران وتمشيت مال امه شغل فيك واذا عيا ومستحيل يعيي

مالك الا هاالطريقه وغيره مااعتقد

وانتبه من البناشر تراها غير معتمده عند وزارة التجاره

والله يعينك توقف الموتر اسبوع الي عشر ايام

ابشركم ي اخوان دخلت على مديرهم وشرحت له الوضع والحمدلله مشت الامور 

وسولي صيانة ١٥ وختمولي ع ١٠ اللي سويتها ف دبي 


وجزاكم الله خير ماقصرتوا