عبث السيارات الكورية بالامان انصح بعدم الشراء

53 21

لايمكنك التصويت حتى الحصول على 20 نقطة على الأقل
إضغط هنا للإخفاء

mr.tahoe 1190
قبل 8 سنه

السلام عليكم

مايحدث في سوقنا من هيونداي وكيا شيء غير مقبول
وكأن السلامة شيء غير اساسي وكأن ارواح البشر
غير مهمة عند الوكيل او الشركة الأم 

نقاط سريعة :

- هل يعقل وصلنا لعام 2016 ومازالت تجينا سيارات بايرباق واحد !!
الالنترا الشكل الجديد اقل فئة ايرباق واحد وسعرها 55 الف ريال !!
التوسان الجديد بـ68 الف وايرباق واحد فقط للسائق
السوناتا تشتري فئة جنوط ومثبت ومواصفات تقول ماشاء الله
بالاخير تحصل ايرباق واحد عندك فقط !! دافع 70 الف على ايرباق واحد ..

هل هذا يعقل ؟

- افهموني ياناس انا ما اقول يصيرون زي الامريكي ايرباقات كثيرة
وعلى الجوانب ومانع انزلاق ودنيا , لا انا بس ابي ايرباقين للسائق والراكب
وبس ما قصرتوا

- مو من المنطق ان نيسان صني الي سعرها بـ35 الف تجي بايرباقين وABS
والهيونداي واصل 70 الف بايرباق واحد فقط

- حتى تويوتا المشهورين بتشليح المواصفات , ترى يارس 2010 سياحي قزاز هندل
تجي ايرباقين .. الي صاير غير معقول

- لا احد يجي يدافع عن الشركات ويقول الوكيل هو السبب , الشركة اساسا
لو تحترم المستهلك ما سوت هالشيء , وسمحت للوكيل يطلبها كذا 
وش معنى فورد وشفرولية ونيسان ما يسوون كذا ؟! هل عشان وكيلهم حنين ؟
لا الشركة تحترم نفسها وتحترم الزبائن 

- ارجو محد يزعجنا باسطوانة ان الايرباق ماينفع الا وانت رابط الحزام
انت اصلا المفروض طول الوقت رابط الحزام , فـ بلاش فلسفة وتعزيز للوكيل

- للاسف حتى الشركات حصلت من يدافع عنها باعذار غبية وغير منطقية
مثل ان الايرباق لو صدمت بيكلفك عشان ترجعه فـ ايرباق واحد ارخص لك
والي يقول اذا ناقزت بالبر ولا ضربت لك شيء ما يسوا احسن ان مافيه ايرباق
عشان مايطلع وكل هذي الاعذار تخليك تمسك على راسك

- كلامي عن السيارات الي باسعار متناولة اليد , لا يجيني احد من حقين الجينسس
يطلع لي طلعات !! ويقول السيارة امان وبطلة , عارفين ياشيخ

- والي يقول تخفيض تكاليف عشان سعر السيارة مايكون غالي
اقول هذا الصني والسنترا اسعارهم رخيصة وايرباقين ومواصفات طيبة
والمازدا 3 نفس الشيء
والالنترا ضارب سعرها فوق ومافيه امان , فسالفة التكاليف هذا عذر قبيح وكلام فاضي

- والله عيب تركب سيارة موديل 96 تحصل فيها ايرباقين وسيارة 2016
وسعرها غالي مافيها الا ايرباق واحد

- الكوري يبغاك تشتري فئة عالية عشان تحصل امان , يعني انا لو معي فلوس النترا سياحي
ما يحق لي اخذ مواصفات امان ليه ؟ عشاني طفران يعني ولا كيف
لازم اشتري فل عشان احصل امان 




==========
كل انسان حر بالي يسوي , انا انصح ان محد يشتري , الان فيه بدائل كثيرة
واغلب السيارات نزلت اسعارها عندك خيارات كثير غير الكوري

الايرباقين والـABS حاجات مهمة , ماعليك من الناس الي يقول يارجال الحافظ الله
الحافظ الله لكن اعمل بالاسباب

الطرق الايام هذي زحمات سيئة والناس زادت سواقتهم تغيرت كل واحد ماسك لي جوال
ويلف عليك فجاة ويورطك معه او مع غيره وانت تبلش وهو يمشي سلام سلام

خلونا نتكاتف لو مرة , والله الي صاير عيب واستحقار للمستهلك في السعودية
ان اعجبك الموضوع ارجو نشره

إبلاغ

الردود