ماذا اتفاقد في السيارة قبل السفر ؟ ا كسنت 2016 ستاندر وعلان

تفك الكبوت و تشيك موية الرديتر  تفك الغطاء و تشيك المويه و تسحب عيار الزيت و تمسحه بالمنديل و تدخله و تسحبه مرة ثاني اذا الزيت في الخط الاول معناها الزيت موجود و اهم شي نظيف تلاقي لونها صافي  و اذا الزيت وسخان تلاقي اللون اسود  و شوف الكفرات لو مهبل او شي 

دامك شريت اصفار خير مافعلت غير الزيت كل ٥٠٠٠ مع السيفون وصلى الله وبارك الاكسنت تكرف ولا تطلب شي واي استشارة حاضرين 

1- اهم شي لاتمشي والكفر منسم عشان لايحبل او ينصلخ عليك بوقتها وارجع الى تعليمات ضغط الكفر تجدها على باب السائق ملصقة وكل كفر له درجة ضغط معينة فحاول تطبق نفس التعليمات

2- لا تمشي بالسيارة ولمبة البنزين مولعه لأن مع الوقت تروح عليك الصفاية والطرمبة وتكلفتها 2000 ريال على اقل تقدير

3- تشغيل المكيف على سرعات بسيطة يفضل تحت ال40 والاطفاء بسرعة 70 مايضر

4- تشييك على زيت المكينة بعد اطفاء السيارة ومرور خمس دقايق لأعطاء افضل نتيجة للعيار او قبل تشغيل السيارة وهي باردة ولضمان افضل قراءه تجد الحد بالوسط بين الحد الاعلى والحد الادنى وهذي القراءة الصحيحة

5- تشييك على زيت القير بعد اطفاء السيارة مباشرة اسحب العيار لأفضل نتيجة 

6- تأكد من وجود عفريته ومفتاح عجل وكفر استبنه نظيف وغير منسم او منتهي (ضروري جدا)

7- علق دعاء السفر ولا يخلو من سيارتك وعسى الله يحفظك والمسلمين اجمعين

دام الموتر جديد اهم شي تفاقد الكفرات من ناحية الهوا او فيه شي ناشب

مسمار او مشابه ذلك وغير الزيت كل خمسه الالف ودز والله معك ..

فك الكبوت شوف عيار الزيت مضبوط او لا . شيك على زيت الفرامل زيت الدركسون . شغل السيارة وشيك على موية الرديتر وماتفتح الرديتر اذا شغلتها الا اذا كانت السياره باردة عشان ماتثور المويه ويجيك شي من الحرارة . شوف مستوى الموية تمام او لا . شيك على زيت القير اذا لها عيار .موية المساحات خذلك نظرة فيه اسلاك مفصولة طايحة او شي. اذا امورك تمام قفل الكبوت . شف للكفرات جميعها فيها مسامير فيها تحبيل او شي . شيك على الاستبنه امورها تمام ومعباه هواء.اذا امورك تمام قول توكلت على الله ولاحول ولاقوة الا بالله ودعاء السفر. وتوصل وجهتك سالم معافى ان شاء الله.

تأكد اول شي وقبل اي شي 
من ضغط الكفرات 
ثاني شي موية الرديتر تاكد انها واصله للmax ولا تعدي كلمة الmax 
زيت المكينة اذا انك مغيره على ال5000 خلاص ما يحتاج تغيره 

الاكسنت والالنترا وبعض السيارات الاخرى في نظام اسمه eps 
كل ما زادت سرعة السيارة الدركسون يثقل 

وبالنسبة لان السيارة مخنوقة 
الاحتمالات 
1-مكينة السيارة صغيرة فممكن هذا حدها
2-ممكن القير حقك نظام cvt الي هو نمره وحدة يعنى تدبل دعسة السيارة تمشي طبلونها بنمرة وحدة 
3-ممكن انت وديت السيارة لبنشري وحط لك زيت ثقيل على المكينة
4-ممكن انت مكثر اغراض في السيارة 
هذا ما عندي 
واي سؤال او استفسار لا يردك الا كيبوردك

وفي حاجة مهمه نسيت اقول لها لك 
اذا كان طريقك مسافة طويلة حط بخاخ حق السافي وانتظره حتى ينشف بعدين كمل طريقك
اشتريت الالنترا وما كملت ال2000 كيلو الا واجهة السيارة شهبت 
والكشافات والشنعات انعدمت
الصدام كان لونه بني محروق صار ابيض 

السلام عليكم , راح أحاول و أتمنى أن اوفق فيما أقول

1- تشييك ماء الرديتر من خلال القربة لا تفتح غطاء الرديتر أبدا التششيك و التزويد و المتابعه من خلال القربه .
2- تشييك مستوى زيت المكينه و مدى لزوجته
3- تشييك مستوى سائل الفرامل بالنظر للمستوى (تجنب فتح غطاء العلبة مع الوقت بتدخل الرطوبه و الهواء و تقل كفاءة الزيت )
4- تشييك مستوى زيت ناقل الحركة ( إذا كان في معيار ) و تاكد من انها عند علامة فل بارد أو فل حار بعد مشوار 
5- تشييك موية المساحات و انصحك تحط منظف القزاز تنظيف ممتاز و يحافظ على ربلات المساحات 
6- تفقد أسفل السيارة إذا في أي تهريب أو شيء فلتان 
7- شيك هواء الكفرات و النظر لها في حال وجود أي تشققات كبيره أو قاسية و ناشفه 
4- تفقد جميع أنوار السيارة من فليشرات و نور واطي عالي نور فرامل إلخ 

في الاخير سيارتك جديده ما راح تحتاج كل هالتشييكات لكن للعلم و مره او مرتين في الشهر كافيه باذن لله للمحافظة على السيارة و على سلامتك

حساب صدقه جاريه للمرحوم باذن الله حسن هزازي
twitter : @hasn_haz 
ياليت تنشرونه للأجر ❤.

مشكورين على التفاعل و المرور الكريم ، ما قصرتم 

نعم شكرا لكم جميعا  حتى انا استفدت من المعلومات 

ونسال الله ان يعطيك خيرها ويصرف عنك شرها

الكفرات = يا ما لقيت مسامير في الكفر عندي .. صار الكفر الواحد فيه أكثر من رقعة

الشباب ماقصروا .. 
اما السياره كنها مخنوقه فهي بسبب القير cvt 
ونزل بالاكسنت بموديل 2016