أضف سؤال أو موضوع جديد          

تجربتي لسيارة الشعب هونداي اكسنت خلال 100000 كلم

up 50 down 50
benz lover -42
قبل 3 سنه و 5 شهر



السلام عليكم ورحمة الله وبركاته 

قبل اي شي ياشباب اللي شايف السيارة ابو كلب وماتستاهل في زر X في زاوية الصفحة 

طبعا سيارة هونداي اكسنت اكثر سيارة غنية عن التعريف وتعتبر من فئة سيارات المدينة الصغيرة المنتشرة بكثرة بانحاء المملكة 

اللي معي موديل 2013 فكيتها وكالة من الوعلان خريص ب 40500 كاش طبعا مواصفاتها :

ماكينة 1400 CC

كشافات 

قير اوتوماتيك 

قزاز عادي عشان الخرابات بالمختصر الموتر اخذته للكرف 

ايجابياته : 

1- صرفية قليلة 1400 CC اعبي الفل 91 ايام زمان ب 16 ريال اذا مولعة اللمبة والان 26 ريال يمشي حوالي 400 كلم تزيد او تنقص 

2- نوعية الزيت اللي استخدمه بترومين 10- 30 تاخذ 3.3 علبة مع السيفون و 3 بدون سيفون جربت عليها زيت 50 - 20 ثقل الماكينة بشكل كبير وصارت ماتمشي كويس ابد 

3- موتر حجمه صغيرة يزبن بالزحمات وروعة بالمواقف ماتشيل همه 

4- مكيفه حلو بالنهار جيد جدا بالليل ممتاز 

5- منفذ AUX , USB , ipod عند الولاعة 

6- طبلون ليزر زي اللكزس يشتغل من اول ماتدق سلف 

7- موتر كرف وكد ومد مايقول اح ترقى رصيف تاخذ مطبات سفري يقولك هل من مزيد 

8- قطع غياره ببلااااااااش الصدام على 150 ريال تايوان حتى الاصلي حوالي 400 يعتبر رخيص 

9- قير تيبترونيك 4 سرعات عملي ويتحمل كرف وبالخط مريح لابأس على سرعة 130 الضغط 3 

10 - سرعتها القصوى توصل 190 وهذا رقم طيب على حجم ماكينتها 

11 - يعشقونها الشباب بسبب القدرة على التخييط بين السيارات بسهولة وهذا خطر طبعا 

12 - سعر الموديل الجديد رخيص جدا 34500 سعر جدا ممتاز 


نجي للسلبيات : 

1- ماكينتها مع المكيف والزحمة يلا تشيلها ماتمشي وعزم ميت المفروض الستاندر تكون 1600 CC

2- الرساوة سيئة جدا فوق 120 

3- عدم وجود نظام ABS كتجهيز قياسي الا بموديل 2016 !! 

4- وجود ايرباق واحد فقط 

5- المكيف مع عز الضهر مايبرد زين مع ان الفريون تمام وكل شي تمام 

6- موتر مشبوه خصوصا اذا مافي طيس كل نقطة توقفك 

7- موتر ينسرق بسهولة 

8- البودي ضعيف جدا اي دقة يروح فيها بالتالي الامان بالله سبحانه وحده 

9 - طراز الستاندر مايجي تكاية مع درج تجي تكاية صغيرة للسائق فقط وهذا امر مزعج جدا 

10 - شكلها اصبح قديم من سنة 2011 الى 2016 

11- عزل الصوت سيئ جدا لو تكلم بالشارع وانت مقفل الدرايش سمعت كل شي ولو في عواصف يخش هواء قوي داخل السيارة جلد الابواب ماتسوي شي

12- نظام التعلييق قاسي جدا وغير مريحة بالمسافات الطويلة  

13- مواصفات كثيرة مايجيبها الوكيل الا بالفل كامل دققو بالطبلون زين في لمبات ماتشتغل مثل : 

* مانع الانزلاق ( تراكشن ) 

* مثبت سرعة 

* نظام مانع الانغلاق ABS 

* نظام مراقبة ضغط الكفرات 

* تحذير نقص سائل الزجاج الامامي 


بالنهاية الموتر اعطيه تقييم 7 من 10 بشكل عام موتر للمدينة مايصلح خطوط نهائيا ولكن ينفع يكون بجانب سيارة فخمة توقفها وتستخدم الاكسنت مكانها وتنفع للسواق والمشاوير القصيرة ماتقول شي

الصورة الاخيرة مواصفات امريكية : 

شوفو فرار المكيف 1 2 3 4 بوسطه في زر AC اللي عندنا يكون فاضي وله زر مستقل طبعا هم نزلوه تحت لان السيارة فيها 6 ايرباقات عندهم اللمبة حق حساس الراكب تكون فوق 

وهذا فيديو يفتح النفس يوم يدق سلف الف لمبة تشتغل بالطبلون تقول لكزس موب زي هنا يلا كم لمبة تولع تقول ددسن 85 

https://www.youtube.com/watch?v=4hAChmzhMsg


هذا تسارع ماكينة 1600 : 

https://www.youtube.com/watch?v=caZl4KiwJtw

وهذا تسارع 1400 قير CVT : 

https://www.youtube.com/watch?v=CoTmromzuMo


هذا للي جاب ببالي ياشباب واتمنى يعجبكم :)



 








إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


معي اكسنت 2012 فعلا كلامك صحيح ....

كيف نحميها من السرقة ... فيه اشخاص يشغلوها بغير مفتاحها ؟؟؟


up 3 down 1
fares500 18
قبل 3 سنه و 5 شهر



اخوي بنز لوفر بالله شوف الخاص ارسلت لك بموقع حراج


up 1 down 1
abodi dahlan 165
قبل 3 سنه و 2 شهر