أضف سؤال أو موضوع جديد          

مهم جدا .. سبب تخبيط مكائن 2400 الكورية

up 33 down 8
ابو هيثم 7 2249
قبل 3 سنه



السلام عليكم ورحمه الله

زي مانتم عارفين السيارات الكوريه تعاني من مشكلتين الاولى تخص التكييف والثانية تخبيط مكاين 2400 .. المشكله الاولى نزلت لها موضوع خاص اسمه (( عدة حلول لمشاكل التكييف بالسيارات الكورية )) اللي يبغاه يضغط على اسمي ويحصله

اليوم بنتكلم عن مكاين 2400 ونزلت على السوناتا والاوبتيما والتوسان والفان H1 والسبورتاج والازيرا والسنتافي (4 سلندر) لكن اشهرها كانت على السوناتا وللمعلوميه من عام 2009 الى 2017 نفس المكينه ماتغير فيها الا حاجات بسيطه .. وكثيرررر مانسمع عن هالمكينه انها تخبط بسرعه وانها غير عمليه ومن هالكلام .. انا بحكم تجربتي اكتشفت ان خرابها بسبب 3 اشياء :

1/ استخدام زيت ثقيل بالصيف وخفيف بالشتاء .. للاسف كثير من الناس مقتنع بهذي الخرافه وتحصله يحط زيت 20w50 بالحر و زيت 10w30 بالبرد .. مع انها غير موجوده بالكتلوج نهائيا وتستغرب كيف مقتنعين بذي المعلومه ؟ واذا ناقشته قال بالصيف درجه الحراره توصل 50 ؟ طيب هل تعلم ان درجه حراره الزيت داخل المكينه هي 90 درجه مئويه (( للمعلومية تراها ثابته صيف وشتاء )) بالله عليك الحين ايهم اعلى 50 او 90 ؟؟؟

طبعا هالنوع لاتستغرب ان طرمبه الزيت تخرب عنده وهو ماكمل 30 الف حتى .. لان الممرات حقات الطرمبه ضيقه (( وانتبه لذا الشئ خصوصا )) وطبيعي يكون دفعها للزيت ضعيف ف ماينفع لها بذا الحاله غير الزيت الخفيف مثل 5w30 وهو افضل دائما وبكل الاحوال من 10w30 حطها ف بالك دايم


2/ استخدام فلتر زيت مقلد .. للاسف الغالبيه تلقاه ياخذها من البناشر (( سواء كانت بناشر عاديه او بناشر معتمدة )) ويقول البنشر المعتمد اكيد اصلي .. بالاخير اقولك لا تثق الا بنفسك وخذه من قطع غيار الوكاله افضلك ترى سعره 18 ريال (( عند الجبر وكيل كيا )) ولو اخذت 4 او 5 حبات تكفيك سنه كامله

للمعلومية الفلتر الاصلي فيه مغناطيس يجذب برادة ونشارة الحديد ويمنعها من الانتشار داخل المكينه .. لكن الفلتر التجاري مافيه مغناطيس ذا اولا ، وثانيا نوعية الورق الداخلي فيه رديئة جدا ومع الحرارة وطول الوقت تتفتت وتتقطع وتمشي مع الزيت الى داخل المكينه لين توصل الشخال حق الطرمبة وتسدده وبسببها يضعف دفع الطرمبة وماتدفع الزيت لكامل اجزاء المكينه وهنا المصيبه الكبرى لان عمود الكرنك بالحاله ذي يدور بدون زيت ووقتها ينكسر وتخبط المكينه .. شف ان البلاوي كلها سببها الفلتر التجاري ؟؟؟

ولو تحسبها بتحصل انك تغير الزيت 10 مرات كل 100 الف اذا كانت اللزوجه 5w30 ((وهي الافضل لهذي المكينه خصوصا بسبب ضيق ممرات الزيت كما ذكرت سابقا )) يعني بتدفع انت 180 ريال للسيفون فقطططط والنوع الردئ تحصله بنص السعر او اقل .. ايهم افضلك تدفع فرق 100 ريال زياده على فلاتر اصليه مضمونه لكل 100 الف او تدفع 7000 الاف قيمه مكينه من التشليح لان موترك خبط بعد انتهاء الضمان ؟ اكيد بتختار الاول على قولتهم الوقايه خير من العلاج


3/ استخدام زيوت 10w30 نوع سيء ؟ المشكله ليست في اللزوجه (( لانها موجوده بالكتلوج )) انما بالنوع اللي يختارونه .. وغالبا يكون زيت كاسترول GTX العلبه البيضاء او زيت شل هيلكس العلبه الصفراء وهذا اجرام بحق الموتر لان تصنيفهم هو SL وهالتصنيف ينفع لمكائن الحديد ((وليس الالمونيوم )) بالاضافه الى انه قديم جداا وطالع من عام 2001 يعني قبل 16 سنه !!!

ونزل بعده تصنيف SM عام 2006 ثم تصنيف SN عام 2011 وهو احدث تصنيف .. اذا تبي تسلم ركب التصنيف المناسب اللي هو Sm بما ان المكينه مازالت على تقنية 2009 او اختار التصنيف الانسب اللي هو Sn

يجيك واحد ويقول طيب كاسترول يغير بالوكاله معقوله تصير انت افهم منهم ؟ ياعزيزي هل تعلم ان الوكاله تستخدم زيت شل هيلكس 10w40 العلبه الزرقاء او 5w40 العلبه السوداء وبعض الاحيان 15w40 مع انك لو تقرأ الكتلوج اتحدى تحصل هاللزوجات الثلاث نهائيا ؟؟؟ وازيدك من الشعر بيت فيه وكاله ثانيه مازالت تستخدم لزوجه 20w50 !!! الوكالات تتبع مصلحتها فقططط والعرض اللي يشوفونه الاقل سعرا والادنى تكلفه يوقعون معاه

حتى لو افترضنا انه خبطت مكينه موترك وغيروها على الضمان تحسب ان الوكيل بيخسر شي ؟ لو يركبلك 10 مكاين ماراح يدفع من جيبه لان اللي تتحملها هي الشركه الام .. فخلك ذكي ولاتقتنع بالاستيكرات اللي توصي على زيت معين ترى كلها دعايات لا اكثر ولا اقل .. احد الوكلاء قبل سنتين ونص كان يستخدم زيوت كاسترول والحين محول على زيوت شل هيلكس ويستخدم ( بعض ) درجات اللزوجه الغير مذكورة بالكتلوج نهائيا .. والثاني كان نفس الشي لكن الحين محول لبترومين .. والثالث مستمر على كاسترول حتى الان

للامانة لازم اذكر حاجة تخص زيوت شل هيلكس .. كثيررر اللي تواصلو معي بالخاص او بالتعليقات هنا وقالو ان فيه نوع من شل هليكس ممتاز ؟؟؟ بالنهاية طلعو يقصدون نوع واحد من الزيت السعودي اللي وكيله الجميح وهو مختلف كليا عن اللي بوكالات هونداي اللي تبيع شل هيلكس انتاج عمان بتصنيف قددديم .. اذا حصلت بالبناشر او محلات بيع الزيوت بالجمله زيت شل هيلكس 10w30 (( علبه زرقاء )) هذا هو السعودي الممتاز وتصنيفه SN .. اما العماني والسعودي اللي يجيك 10w30 بس علبته صفراء سواء بشعار هونداي او بدونه المهم ان تصنيفه SL انحشش عنه (( ومايجي بالعماني علبه زرقاء الا لزوجه 10w40 وليست 10w30 ))

________________________________________________________________________


طبعا التحذير من زيت كاسترول GTX فقططط لان تصنيفه قديم .. لاحظ اني ماجبت طاري زيوت كاسترول الاخرى مثل ماجناتيك العلبه الخضراء او ايدج العلبه الذهبيه

واللي يسأل وش استخدم من الزيوت .. عندك درجه لزوجه 5w30 وفيها اكثر من نوع اثبت عليها صيف وشتاء وريح راسك .. واذا انت مصمم على زيت 10w30 (( مع اني ماانصح فيه للمكينه ذي بالذات )) عندك زيت موتر كرافت لان تصنيفه مناسب وهو SN

خلاصة الكلام // انا ادري انه بتجيني بالتعليقات واحد كاتب انا معي جمس انا معي هايلوكس وموصله 500 الف ولي 10 سنين استخدم كاسترول ؟ ياعزيزي نحترم وجهة نظرك وتجربتك على العين والراس لكن الموضوع واضح ماجبنا طاري لاجمس ولافورد ..ويمكن يكون افضل اختيار لسيارات اخرى لكنه الاسؤا بالنسبه لمكينه السوناتا لانها حساسه اكثر من غيرها
.
ايضا عندك موقع حراج اكتب بخانه بالبحث ( سوناتا مخبطة ) بيطلع لك اكثر من 40 اعلان اتمنى انك تروح تسألهم عن الزيت اللي كانو يستخدمونه قبل التخبيط ؟؟؟ وشوف وش يقولون لك

وارجع واقول ترى الموضوع يشمل مكائن 2400 لموديلات 2009 ومافوق مالي علاقه بالموديلات الاقدم او المكاين الاكبر او الاصغر مثل مكينه 2000 للسوناتا .. حاول تجنب الاشياء اللي ذكرتها وبإذن الله وضعك بالسليم .. لان هالنوع من المكاين ( حساس اكثر من غيره ) واغلب تخبيطاتها تكون بسبب سوء الاستخدام وليس عيب مصنعي

___________________________________________________________________


" تحديث : أشكركم على التفاعل واثراء الموضوع لدرجه ان التعليقات تجاوزت 130 رد وهذا شرف كبيررر لي .. والغالبية اتفقو معي ان المشكله مشكله زيت بالمقام الاول وكلنا نعرف ان لزوجة 5w30 فيها النوع الزين والشين ولكن ماقد مر علي احد يستخدم هاللزوجه وخبطت مكينه 2.4 معه نهائيا..

البعض يقول عمود الكرنك فيه عيب مصنعي هذا رديت عليه بموضوع ثاني شوفه من هنا https://hyundai.montada.haraj.com.sa/81557/مكاين-السوناتا-والعيب-المصنعي-..-اعرف-السر-/

ونترككم مع الصور.. في أمان الله

















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


بموضوع الشيل هيلكس الي تقول تخليقي بالكلام بس لزوجته غير مناسبة عندي بالكاتلوج موصين فيه هو و 5w-30 سوى وبعدها تجي اللزوجات الثانيه طبعا الموتر اوبتيما 2017


up 0 down 0
khalooood77727
قبل 3 أسبوع و 3 يوم



الي اقصده الصوره الي قبل الاخيره


up 0 down 0
khalooood77727
قبل 3 أسبوع و 3 يوم