تجربتي مع منظف البخاخات والطريقه الصحيحة للتنظيف

8 3

لايمكنك التصويت حتى الحصول على 20 نقطة على الأقل
إضغط هنا للإخفاء

1990-1411 15
قبل 7 سنه و 11 شهر

السلام عليكم ورحمه الله


بالبدايه يااخوان سمعت ان بناشر بترومين تنظف البخاخات بسعر 300 ريال او حولها .. رحت اشوف طريقه التنظيف عندهم اكتشفت انها طريقه غبيه جدا وضررها اكثر من نفعها

اول حاجه يفصل ليات البنزين اللي جايه من التانكي بعدها يجيب بخاخ غريب مدري وش اسمه ويقعد يبخ كل شوي وتطلع دخنة بيضاء من موترك كنه مخبط ؟؟؟ اما السلبيات الاولى انه يوسع فتحات البخاخات وتزيد صرفيه البنزين عندك بلا فايدة ( يعني مايزود العزم ولاشي ) ثاني حاجة انه مايمر على دورة البنزين كامله ؟ فقط البخاخات مع غرفة الاحتراق

الطريقه الصحيحه للتنظيف من وجهة نظري هي انك تشتري منظف خاص وتصبه بالتانكي ( بشرط انه يكون التانكي على النص واكثر مب لازم تفلل ) وتمسك خط طويل وتحرص على ان التانكي يفضى علشان المنظف فيه مواد حارقه وماينفع تجلس بالتانكي اكثر من 24 ساعه

ولكن بما ان موتري هونداي فيه منظف خاص له ماتحصلونه الا عند قطع غيار كيا الجبر يعني لاتتعب نفسك وتروح للوعلان وباقي وكلاء هونداي ههههههههه انا مدور قبلك وماحصلته الا عند وكيل كيا ..

ميزة هالمنظف عن باقي المنظفات المشهوره انه مكتوب عليه ( يستخدم على 3 فترات ) يعني ماتصبه دفعه وحده وبالتالي تضمن انه مايعدم عليك الليات اذا جلس اكثر من 24 ساعه .. وعلشان تحصل على افضل النتائج استخدم هالمنظف بعد ماتغير صفايه البنزين لانه ينظف دورة البنزين كامله بدايه من الطرمبه او العوامه مرور بالفلتر او الصفايه اللي فوقها ثم يمشي مع الليات لين يوصل البخاخات وينتهي بعدها في غرفه الاحتراق ف احتمال بسيط يكون فيه وسخ وتراب متجمع بالصفايه اذا كانت قديمه وهالمنظف راح يحركها ويمكن تحصلك تفتفه فالافضل تكون جديده


اما بالنسبه لمحركات الديزل ف انا استخدمت زيت الدركسون وصبيت علبه كامله بالتانكي (( هالحركه مشهووورة واكثر مايسويها راعين الدينات والتريلات )) طبعا الفايدة منها ان البنزين والديزل تنشف الجلد الداخليه والزيت يعيد ترطيبها من جديد (( انت جرب واغسل يدك ببنزين .. بتلاحظ بعد دقايق ان يدك صارت شهباء ؟؟؟ بالمقابل حط على يدك الثانيه زيت بتلاحظ انه صار عليها لزوجه )) هذا نفس المبدأ بالضبطططط

للمعلومية انا استخدمت زيت الدركسون على موتري الثاني الديزل وسمعت ان البنزين ممكن تستخدم فيه زيت مكينه (( ولكن المنظف افضل واضمن ))


بالنهاية هذي صور المنظف ياشباب والافضل تطلبه برقم القطعة وموجود بالصورة الثانية .. طبعا ممكن فيه منظفات اكثر شهرة منه مثل منظفات ميتسوبيشي وسوناكس لكن انا جربت هالنوع وكانت النتائج ممتازة ولله الحمد وحبيت انقل لكم تجربتي معه يمكن تستفيدون منها

إبلاغ

الردود