صار لي حادث بسيارتي واخر قسط بيكون بعد ٦ ايام

كيف يعني البنك يسحب عليك بفلوس التأمين! بأي حجه .. سواء انتهت وللا مانتهت الأقساط لازم اللي يصلح السيارة هو اللي بياخذ فلوس التأمين...

عالعموم عشان تطمن .. خذلك زيارة للبنك واسألهم

انا اخاف يحطوها تالف والتعويض دايم يجي للبنك والبنك اللي اسمعه ما يعوض المستأجر منه بحجة انه مستأجر وليس مالك 
بي انا حالتي هيا اني بكون خلصت اقساط السياره كامله بس بدونً نقل ملكيه 

انا بستفسر من البنك بس ويكند الحين يفتحون الاحد والله يعيين

مرحبا اخوي
والحمد لله ع سلامتك لاتسدد لان الشيك بيصدر باسم المالك اللي هو البنك
بياخذون السياره والتعويض ويقفلون العقد
حتى لو نقلت السياره باسمك في تقرير نجم والتامين اسم البنك
وانشاء الله اني افدتك
وناس واجد صارت معهم

اذا سددت ولم يتبقى للبنك في ذمتك لاقسط ولادفعه فأن التعويض حتى لو صدر باسم البنك يحول اليك فورا
ليس لهم حق فقد انتهى كل شي    

او عطهم القسط وانتظر التعويض قل خذوه واكمل لكم الباقي او اذا كاان اكثر من الدفعه خذوه ورجعوا الباقي
فعلا  زي ماقال فهدهبد اللطيف ‏ ┆✾ʟᒧɹ̤ᓄᓗ̣

لا الشيك يصدر باسمك. لانك انت المستخدم. وانت الي تصلح. اعرف واحد معة جيب من الراجحي والتامين تكافل الراجحي وحكتة دينة.و تامينة شركة ملاذوقدرو سيارتة ب8الاف. ونزل الشيك باسمة. لانة قال بيصلح برى. .

شوف لك أحد معرفة بالبنك يعطيك الطريقة اللي تكون من صالحك لأنه ربما تروح تسأل في البنك ويعطيك ايش اللي بيصير ولكن إذا فيه طريقة تفيدك ماراح يبلغك فيها
لأنه عندنا البنوك وشركات التأجير مافيها وضوح بالعقود وأهم شيء عندهم مصلحتهم ولا فكروا بالعميل
أعرف كم حالة راحت سياراتهم تالف بحوادث مرورية  والبنوك مستمرة في أخذ الأقساط!! 

الاهلي اذا السيارة تالفه
التعاونيه يعوض البنك و انت مالك شي
الا اذا الدفعة الاولى مبلغ كبير مهو الحد الادنى
ممكن يرجع لك جزء

المشكلة متشعبه
الوكالة لها تقييم للتالف كل وكالة على حسب
بعضها لو يطلع ايرباق السواق فقط تعتبر تالف

بالنسبة لي حادث احتراق كلي
الوكالة قيمت تالف لان الاحتراق من داخل و التصليح غير ممكن
او مكلف اكثر من نصف قيمة السيارة جديدة

سحبوا قسطين شهرين الى ما تمت المعاملة
تنازلت للملكيه للتعاونيه عشان يضمنون يبيعون السيارة تشليح
عوضوا البنك قيمة السيارة كاش ٩٣ الف خصموا ١٢ الف
حق استخدام سنة
اعفوني من بقية الاقساط و الدفعة الاخيرة
ما رجع شي من الدفعة الاولى ٥% = ٤٥٠٠ ريال
حسب كلام الموظف بعد استخدام اكثر من ٦ شهور
ما يحق لي استرجاع الدفعة الاولى بحالة التلف الكلي
و اخذت مخالصة
رجعوا لي قسطين بحسابي و فوقها ٢٠٠٠ مدري حقت ايش
و اخذت اخلاء طرف حولت للبلاد
على الاقل يقسط بدون دفعة اولى مثل الراجحي

فدايما" انصح طلع سيارة بدون دفعة اولى لو قسط اعلى
و اذا صارت تالف على اخر الاقساط لا تبلغ
اذا مالك نفس فيها او تصليحها مكلف
اعرض للبيع على حالتها او بعد ما تصلح على حسابك
و بعها لو بس تجيب قيمة الدفعة الاخيرة

عاد مدري عن تحديث الانظمة سالفتي صارت بين شهر ١١ الى ٢ الماضي
و الله يعوضنا وياك اخوي الدنيا كلها خساير و العمر ينقص كل يوم

يعطيكم العافيه وما قصرتم 
بكرا بروح للبنك واشوف وش سالفتهم بالضبط 

بيض الله وجيهكم والله يكفينا واياكم شر الحوادث 

اللهم امين بالتوفيق ياغالي
بس ارجع كلمنا وش يحصل معاك

عندي النترا 2012
منتهيه اقساطها من سنه ولازالت باسم الشركه
وسويت عليها 3 حوادث 
الفلوس تروح لي بس الشركه ما عطتني ولا ريال
تقول انقل ونعطيك فلوسك
عشاني متاخر عليهم بالنقل 
اهم شي موتر لا يتسجل خساره كليه = تالف 
عشان التعويض ما يروح للبنكً
بالتوفيق

يعطيكم العافيه 
خلصت اجرائاتها من المرور و حولوني على تاميني والتأمين اعطاني ورقة عشان ادخل السياره للوكالة 
والوكاله بعد ثلاث ايام بترسلهم قيمة الاصلاح والتأمين يقرر من تكلفة التصليح اذا كانت تالف والا لا 

والله يعوضنا خير