أضف سؤال أو موضوع جديد          

خفايه واسرار الورش والشريطيه صدمه

up 9 down 3
ابو دحومي 668
قبل 6 يوم و 17 ساعه




يالله حيهم كيفكم طيبون دوووم يارب

ما اطيل عليكم
كنت في الورشه جالس اخذ واعطي مع اليمني لفت نظري مازدا ٣ ٢٠١٦ فل كامل مصدومه من الجنب والواجه صدمه تعتبر متوسطه قمت سألته الباب اشبه مخرق من كل مكان كان اشترى باب تشاليح او من قطع الغيار

قال
اصلا هذي انا اشتريتها من راعيها ب ١٥ الف وماشيه 53 الف كيلو وان شاء الله اصلحها وابيعها ب ٤٥ الف ٥٠ الف
طبعا انا قعت دقيقه مسرح ومفجوع
وقلتله طيب انا شراي من باب المزح
قام قالي !! ماني بايع لانك عارف بلاويها اما الزباين لو تحط مويه وملح ع المكينه ما دري عليه من المظهر الخارجي بس
عاد انا بغيت افصل عليه لكن قلت خللك طبيعي خلك طبيعي و اشيك ع باقي الورشه اخذ واعطي معهم بالكلام
واروح عند ورشه سمكره اشوف اكسنت ٢٠١٥ مصدومه صدمه جنبيه اووووه تالف ما يبغالها
دخلت عليه السلام كيفك علومك
سلامات وش جاه ذا
قلي والله مدري بس شكله صادم عمود وقتلته تالف
قام قال لا
شريطي اشتراها ب ٢٠٠٠ ريال ويبغى يصلحها
قلتله ويبيعها وبترجع مثل اول مرة
قام وقال: تشوف
عموما جيته بعد اسبوع تقريبا لقيته ملحم جنب ومعدل الشاص وسحب ودنيا وفاك الديكورات والسياره لون بني ولون ابيض وحرق وتلحيم
مر علي تقريبا اسبوعين ونقص عندي الفريون ورحت اعبي فريون وقلت يا رجال خلني اشيك ع الكسنت
واورح لليمني ااسلام عليكم وعليكم ااسلام

ها الكسنت رجعت قلي شوفها وراكك

يا ولد السياره تلق تقول امس مطلعها

قلي الان بيجدد الاستماره ويفحص ويبيعها

طبعا انا صورة السياره لكن الصور انحذفت من السناب ونسيت ما احفضها

اكسنت ٢٠١٥ جنوط فل وبدون فتحه لونها بني فاتح جده







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اخي الكريم
للاسف واقع مرير نعيشه بالسعوديه. تجيك الجمارك والمقاييس فاردين عضلاتهم على الاستيراد. ماعندهم الا ممنوع تدخل السيارات لاننا نخشى على حياه المواطن الكريم من السيارات المستورده الملحمه او المقصوصه او او الى اخره من الهرطقات المكشوفه. والسبب الحقيقي لان السيارات المستورده نظيفه وبنصف ثمنها هنا لكن هم حريصين على جيب المواطن وليس سلامه المواطن والدليل انهم يعتمدون على المواقع الامريكيه في الكشف على السيارات. طيب من باب اولى انشاء قاعده بيانات خاصه بالسيارات السعوديه. اذا سياره صار عليها حادث تتصور وبرقم الشاص توضع بالموقع نفس نظام الكارفاكس حتى ندفع مو مشكله. اليس في هذا حرص على سلامه المواطن والمقيم ..لانزايد على الوطنيه هذي حقيقه لاتحجب بغربال...يمكن عمل هالشي بكل سهوله بربطها بنظام نجم مثلا. اذا حادث كبير وتالف توضع بالملف الخاص. حادث بسيط ايضا توضع بالملف مع تحديثه بعد الاصلاح....هذي الحقيقه اللي محد يبي يعترف فيها ...قحش الدراهم اهم من حياه البشر والدليل كلام صاحب الموضوع فوق اللي يغبن الواحد
بالتوفيق للجميع.


up 14 down 1
midnight_963 274
قبل 6 يوم و 15 ساعه



والله الواحد بعد كذا يعاف المستعمل
(من غش فليس منا )
متى يفهم الشريطيه واصحاب الورش
ما يجوز ما يجوز هذا غش


up 0 down 0
لا للغلاء 430
قبل 6 يوم و 15 ساعه




midnight_963 كفيت ووفيت اخوي واضم صوتي لصوتك وفعلاً يهمهم سلامة المواطن هههههههههههع


up 1 down 3
abo- hassan 115
قبل 6 يوم و 15 ساعه



ماعاد فيه لاذمه ولا ضمير

كلن بس يبي يعبي مخابيه بالفلوس حتى لو حرام


up 1 down 1
بايع الدنيا 66 786
قبل 6 يوم و 14 ساعه



مفروض اي حادث يتسجل بالصور في نجم او المرور ويقدر اي واحد يشيك على تاريخ السياره في النت او مراجعه القسم المختص او بالاحرى نفس الكارفاكس علشان نبطل النصب اللي صاير


up 1 down 1
camaro28 363
قبل 6 يوم و 14 ساعه



خويك الي يقولك مازدا 3 ب 45 الف هذا كذاب 
اصلا ماتجيب هالقيمه لو كانت بدي وكاله 
كان عندنا وحده بدي بلد ستاندر بالموت بعناها ب 27500 وماشي 90
مستحيل الفل كامل تجيب فوق 40 وعدا عن ذلك تقول فيها صدمه 
الشي الثاني 
ما يخص احد انه السياره تتصلح او لا طالما ان البائع يذكر انه جاتها صدمه وتم اصلاحها
يعني الصناعيه مليانه مواتر مشيصه وايرباقاتها طالعه 
تتوقع الحكومه تبي تقعد تحاسبك ليه تصلحها ؟؟ 
انا عندي سياره استخدام وصدمني تورس قاطع الاشاره 
طعج الشواصي وعدم الرديترات 
صلحتها وصارلها 6 شهور الحمدلله مافيها مشاكل ولا غيره 
حتى بيع ماني مفكر ابيعها 
ولو جيت ابيع اقول انه فيها شاصي مضروب 
وخله يفحص
يمكن كلامي يزعل البعض منكم 
انا رجال ابيع واشتري بالسيارات 
الشرهة على اثنين :
1. الي يستغل جهل الزبون 
2 . الي يشتري بدون ما يفحص 

الاول يحب الزباين الاغبياء الي تمشي عليهم الكلام الحلو والسياره الملمعه 
الثاني غبي جاي يحط مبلغ وقدره ويبخل ب 300 ريال للفحص ولو كان غير كافي او غير صادق 100‎%‎ بس شي يغني عن شي 
انا بدون فحص بعت سيارات كثيره 
واغلى شي بعته بدون فحص كان ب 130 الف 
لكن الحمدلله السياره وصلته زي ماكان يتوقعها 
بالعكس السياره معروفه عند شباب القومات وباعها بعدي بمكسب جامد 
اممم
السوق فيه اشياء كثيره تخوف
وسمعه شريطي السيارات بالذات سمعه سيئه 
انت لو تفكر فيها صح 
الجوالات لها شريطيه 
السيارات لها 
البناء والعمران له 
الاسهم 
الخضار 
وغيره 
كلهم تجار يترزقون الله بالسلع الي ذكرتها 
لكن السياره بحكم انها وقعت بشي مادي "مبلغ يأثر " على الافراد منخفضي الدخل ومتوسطيً الدخل 
تلقا الكل يتكلم عنهم بالسوء تحت مصطلح الخير يخص والشر يعم 
عاد الكلام كثير وما ودي اطول 
لكن مهما كان الي بايعك طيب 
لا تشتري بدون فحص 
ياخي الفحص عمره ماكان ضد مصلحه المشتري !! اذا انت ماتبي مصلحتك لا تجي تبكبك وتقول غشوني الرجال 
السلام عليكم


up 4 down 0
ليزو 477
قبل 6 يوم و 12 ساعه












ياخي انا ابغى افهممممم شيء 
الان كل مكان فيه غش ما اختلفنا 
وفيه ناس ما يخافون الله وو .. الخ 
لكن النسبة قليل جدا جدا 

الا في مكان واحد ( معارض السيارات ) 
نسبة الغشاشين ككثيررر 
لدرجة انه يبدا بذمة وبعد كم سنة يقلب غشاش 
ليه ؟؟ انا ما ادري ؟؟؟

يا اخوان خافوا الله فينا 
نحمل عوايل واسر في سيارات متهالكه ومقصوصة 
ونسافر 
خافوا الله فينا ارجوووكم 
اسالكم بالله العظيم ان تخافون الله فينا 

فقدنا اسر في حوادث بسبب خلل في السيارة 
اللي فقد ابوه وامه واهله 
اللي صار مشلول 

لا اله الا الله 




up 4 down 0
حرف الالف 720
قبل 6 يوم و 12 ساعه



بالحراجات احصل البكستنه يببعون سيارات مصلحينها بورشهم
وفيهم ميزه ماتغير
لازم تجد الاكياس ع المراتب والابواب
لازم تجد قرطاس الوكاله ع التنده والكبوت والشنطه حتى لو مديلها 2010
لازم تجده مركب لها طيس اذا كانت بدون جنوط لا وطيس تلامع صينيه
ابدا سياراتهم فيها صدمه ماتجد السالمه

لاعبين لعب بالحراج ..
.......

وخذ الاشوام والمصرييين والسودانيه
بعد يبيعون ويشترون



up 1 down 0
امير الاصيل 1444
قبل 6 يوم و 10 ساعه



الدعوة كلها لعب في لعب 
سلام عليكم 


up 0 down 0
nasser1430 182
قبل 6 يوم و 7 ساعه



والله يا زين الجديد


انا ما اشتري الا جديد لو سلف من البنك


ادفع كثير فيها ولا ادفع كثير في تصليحها


الحمد لله ما اشتري الا وكاله



وعما قريب ناوي على فورد رينجر ديزل جديد 3200 المكينه


قولوا يا رب


up 0 down 0
حكيم المعاني 10221
قبل 5 يوم و 15 ساعه



هذه النصبة و في كل مكان مو بس السيارات ياخي حتى البقال ينصب عليك احيانا اذا تبي ببسي او بسكوت. 

دام كذا الواحد ما ينلام اذا رش سيارته من الخدوش او عدل فيها بعض الطعجات لأنه السوق فيه الطالع و النازل.  انا وش لي بالشريطي

اذا باستخدم سيارتي سنين يعني ما ني ببايع لا الآن ولا بعدين .  وقت البيعة يفتح الله بقول للي بيشتري هذه السيارة عندك افحصها 

عجبتك بالسعر  اللي ابيه اهلًا وسهلا ما عجبك فلوسك معاك و سيارتي معي.   اذا سأل عن الملاحظات اكيد بقوله.  لأنه رب العالمين عينه ما تغفل

واذا هالشريطية ينصبون على الأوادم من ورا ظهورهم ترا رب العالمين موجود و شايف بلاويكم السودة 


up 0 down 0
بدر الباثفايندري 617
قبل 5 يوم و 14 ساعه