الصيانه الدوريه للسيارات

انا اقول البواجي لا تغيرها الا في حالة ان سيارة قامت تتفتف وتقطع

وسير اذا هو يبس غيره
اما اذا هو لين لا تغيره

الصيانة و التشييك عندي بالنسبة لسيارة جديدة

اول تغيير زيت مكينة بشرط
الوكالة تغير لزوجة مناسبة مهو ثقيل 20W50
ثم غير بمركز مثل ون ستوب او اللي مثله

اول تغيير زيت القير بالوكالة تعرف الطريقة و المطلوب

ثم سحبة الى ممشى ١٠٠ الف تشيك على كل شي مجرد فحص

تغيير القماشات و فلتر المكيف و فلتر الهواء
على حسب الحالة و الممشى و برا الوكالة موضوعها سهل

و طبعا" على اي شي يطلع صوت او مشكلة تروح عندهم

غير هالطريقه تضييع فلوس

وعليكم السلام
موضوعك ممتاز جدا
والوكالة وبيترومين وبعض المراكز وبعض الورش
استغلاليييين خاصة بيتروومين
ام الدجة والاستغلال عندهم
وباقة فضية وباقة بنفسجية وباقة ذهبية
كلها خراط في خراط
لو توك مطلع موترك اصفار اليوم وتجيهم الشهر الجاي
قالك زيت القير يحتاج تغيير
او فلتر المكيف يحتاج تغيير او البواجي او فلتر الهواء وووووو الى اخرة
واضحة الفكرة لصالحهم ويحصلون ناس يصدقونهم
بالنسبة للقطع الي تجي على الموتر من بلدة
صدقت مستحيل تشتري قطعهة فلتر او بواجي او غيرة
وتكد معك نفس قطعة بلدها
مثل البواجي وفلاتر بلدها
فية قطع ماتحتاج تبديل وتطول
مثل ماذكرت البواجي او السير
فلتر المكيف ناس تغيرة على 20 الف سلااامات
والله اني ناسي متى غيرتة لاكن اتوقع مشيتة فوق 80 الف
ولا بغيرة تنظيف وارجعة
اما فلتر الهواء اخذت رياضي وارتحت
ماشي علية فوق 150 الف
فقط كل 70 الف له منظف وزيت خاص
انضفه وازيته وارجعه واكرفه
شكرا على الموضوع

الله يعطيكم العافيه صحيح فلاتر الهوا تقدر وتنضفها بالهوا وترجعه الى مايعدم ويتقطع وزيت القير بالنسبه للسوناتا غيرته على 82000 والوكاله يغيروه على 60000 وغيرته عند بنشري لانها سره تفكها من تحت والوكاله الحراميه ياخذون عليك 800 ريال عشان سره يفكوها من تحت وينزل الزيت 

هههههههه يا سعود مستعد اروح للومينا الحين واصور لك فيديو وافكها لك مباشره هههههههه مايبغالها وانا اخوك البواجي لا جيت تفكها معروف تفكها والسياره بارده 

البواجي توفر بنزين اذا غيرتها على ١٢٠.   كلواحد يجرب سيارته كم تمشيه داخل البلد ثم يغير بواجي
مو شرط انها تقطع.   فلتر الهوى الرئه تبع المكينه. يتغير على ٥٠ الف كم كحد اقصى
فيه صيانات ضروريه واخرى غير ضروريه.   السير.  امسكه بيدك بعد ١٠٠ الف كم فكر في تغييره خاصه اذا بتسافر
لانه اذا انقطع بيعدم لك اشياء كثيره ف تراه ب ٦٠ وتركيبه ب ٢٠.     للفورد
ف.    بدال ماتتعطل جدد منت خسران شي 
لاتوسوس.  وينضحك عليك. ولاتترك.     دمتم 

ياخي انا استغرب من اللي سيارته موديل ١٢ وطالع ويغير بواجي 
وينظف بخاخات ومافيها شي اصلا !!
والله واحد اعرفه معاه كامري ٢٠١٠ ماخذها اصفار 
ماغير فيها شي شد بلادها وممشاها للحين ماوصل ١٩٠ الف
حتى زيت القير ماغيره من اخذها وكالة يغير زيت المكينه وكفرات 
وقماشات وماشاء الله ماشيه معاه احسن مما يكون اذا السيارة مافيها شي 
تقطيع وغيره خلاص دامها ماشيه ومافيه عليها ملاحظات

استغرب السيارات كيف ماشية معكم مدري الله يعين المستخدم اللي بعدكم من الخوابير 

ياهلا ببنز لوفر اذا تقصدني 
ترا اقصد بكلامي سيارة ماخذها وكالة وماشيه
نفس اول ماخذتها تصلح فيها وهي جديدة
وتفك قطعه اصليه وتركب قطعه ماتدري كم تمشيك
وهي فيها نص عمر واذا على بيع السيارة
الحمدلله انا اذكر للمشتري كل شي بالسيارة مسمار
عجبته الله يبارك له واذا ماعجبته الرزق عند الله 

عندي مبدأ السياره دامها تمشي ومافي شيء او ملاحظات
ليه اتعبث فيها وادخلها ورشه يشيك عليها وهي مافيها شيء
الورشه مثل الطبيب يجلس يقولك فيك سكر وفيك ضغط
وهبوط بالدم ولازم مراجعه كل شهر مره وهو اساسا مافيك شيء
ويعطيك بذي الادويه الي تمرضك زود
وياكثر مانسمع شايب دخل المستشفى وطلع معه ضغط وسكر ووو
وهو امس مافيه شيء
الورش نفس الشيء خلاص دام السياره ماشيه لاتلعب فيها وتحرص
عليها اكثر من صحتك


سيارات البيت مااذكر غيرنا سيورهم
وغير كذا السيور حاليا تجي اقوى من اول
اول الدداسن وغيره من السيارات تجي سيرين
كل سير عرضه عرض حبل غسيل يمديك تقطعه بيدك
اما الان سير واحد وعريض مره صعب انه
ينقطع مثل سيور السيارات القديمه
باذن الله يمشيك200الاف بالراحه اهم شيء لايجيه شحم او ديزل
والبواجي نفس الشيء اغلب الشركات بواجيها 200الف تمشيك
توني مغير حق سيارتي ولافي اي فرق بالصرفية البنزين

كلامك صحيح

اذا السياره على يدك وكاله

مايحتاج تقعد كل ٥ الاف كيلو بالوكاله عشان الصيانه

معاي اكسبدشن 2014 وبفضل من ربي زي العسل من اول ما اخذته من الوكاله لحد الان

ولا عمره طب الوكاله على الاطلاق .. ولكن جميع قطع الغيار والزيوت تكون اصليه وكاله .. سواء من الوكيل او موزع معتمد

من اول ما طلعته .. وانا اغير الزيت له موتركرفت 20w5 نفس الرقم الموصى به من الوكيل والزيت من شركه فورد العلبه ب١٢ ريال وياخذ ٧ علب والسيفون أخذ اصلي وكاله بسعر ٢٠ ريال واغيره كل ٧ الاف كيلو عند بنشري قريب من البيت ياخذ ٣٠شغل يد والزيت والسيفون من عندي اصلي وكاله

وعلى ممشى ٨٠ الف غيرت زيت القير .. رحت الوكاله واخذت زيت القير مع الوجهه ومع كذا شغله تجي بكج كامل واعتقد سعرهم ٤٥٠ ريال وغيرت زيت القير عند العضيب ب١٥٠ وعليه ضمان شهر على التهريب والحمد لله الحيت ممشاه فوق ١٠٠ الف كيلو

وايضا تم تغير فلتر الهواء على ممشى ٧٥ الف واعترف اني تاخرت والحين راح اخذ فلتر جددي وكاله واغيره مع تغيرة الزيت القادمه باذن الله

وسيتم تغير البواجي لان العزم اصبح ضعيف جدا مقارنه باول وسيتم تغير البواجي بالوكاله لان بواجي الاكسبدشن ما احد يلعب فيها وممكن تنكسر وتتسب في فك الراس

ومالها داعي اقول الوكاله حراميه ومن هالكلام وبالاخير انا اتورط اذا دخلتها ورشه وانكسر البوجي داخل المكينه

فعشان كذا بوديها الوكاله يغيرونها لان باليوم يجيهم اقل شيء ١٠ اكسبدشن .. فلهم خبره كافيه بالهمجال وسيارتي غاليه علي ولا باحطها الا بيدين شخص فاهم خصوصا ان هالشغله مهمه ولا احد يفهم فيها الا الوكاله

وبخصوص صياناتك للسوناتا

ممتاز

انا معاي كيا اوبتما واغير الزيت كل ١٠ الاف من نوع بترومين A1 اخذ كرتون جمله ١٢علبه ب٢٦٠ واخذ فلترين من الوكاله الجبر الواحد ب١٨

واغيرهم

وفتلر المكيف وفلتر هواء المكينه كل ٤٠ الف اغيرهم .. طبعا اخذهم من الوكاله اصليه وسعرهم الثنين مايتعدا ١٥٠ريال

ولكن بخصوص زيت القير

غيرت زيت القير بالجبر لان القير شيء مهم ولا باحط سيارتي بايدين بنشري مايعرف وين الله حاطه فيه

صحيح اغير عندهم زيت المكينه كشغل يد .. بس هذا حدهم وهذا اللي يفهموا فيه .. لكن بخصوص القير فما لهم خبره مثل الوكاله والقير شيء مهم واصلا ما راح استخسر على سيارتي فاشياء زي هذا .. كل سنتين مره او مرتين .. يعني زيت القير كل ٨٠ الف .. يعني ماهي مستخسره اسويها بالوكاله .. ماهي مثل زيت المكينه كل ٥ او ١٠ الاف يحتاج تغير ..

يعني دخلها الوكاله افضل لان ماتحتاج تغير زيت الا كل سنتين مره وحده

واخذت زيت القير من موزع معتمد لوكاله كيا ب ١٦٠ريال ٤علب اصلي وغيرتها بالصيانه السريعه للجبر بمبلغ ١٥٠ ريال ومره وحده اخذت بواجي من الوكاله بسعر اقل من ١٠٠ وغيرتها بالوكاله بسعر ١٤٠ ريال

فمختصر كلامي

بعض الصيانات الافضل بالوكاله .. مثل زيت القير وبعض الصيانات .. اللي بالسنه او السنتين تتغير مره ..

لانها ماهي دوريه ولا راح تستخسر على سيارتك زياده ٢٠٠ او ٣٠٠ في سبيل تسلمها بين ايدي لهم خبره كافيه بالهمجال وسعرهم يعتبر معقول

كلامك غلط في غلط تقول الوكالة يقولون زيت القير 60 الف طيب هم يقولون عشان ماينبكون باقي ملاك السيارات اللي استخدامهم ممكن شاق فمن باب الاحتياط انك تغير كل 60 الف عشان تضمن ان القير مايجيه شيء ولا معروف مو معناته ان اذا غيرته وانت معديها راح يخبط انا الكابرس غيرت زيت قيره على ممشى 98 الف موديل 13 والحمدلله لكن هذا خطأ المرات الباقية كلها على 40 الف ممع ان الوكالة تقول كل 60 الف ،، الشيء الثاني السيور هم يقولون تغيرها من باب الاحتياط والوكالة تقول كل 60 الف وانا غيرتها بالكابرس عندي على ممشى 112 الف وكان مافيها شيء لكن احتياط عشان فيها شوي خدش فالواحد يريح راسه تراه رخيص ماتسوا تمسك خط بعدين وينقطع عليك اما البواجي غيرها كل 100 الف حتى لو الموتر مافيها مشاكل واكيد ماراح يكون فيه مشاكل لكن التزم بهذا الشيء عشان تتفادى بعدين مشكلة انك تجي وتكتب موضوع تقول موتري يتفتف ي شبابب ويجونك يقولون غير بواجي فتكون وقتها عارف ومتوقع مشكلتك من ايش

وطبعاً معروف الوكالة زيت المكينة اغيره عندهم لان لو اغيره برا راح يطلع علي نفس السعر فرق 30 ريال واما زيت القير بالوكالة فقط باقي الامور برا مع العلم ترا البواجي والقطع من محلات القطع والموزعين مو اصلية نفس اللي بالوكالة وتاكدت من هذا الشيء كذا مره المشكلة يلعبون ع الناس يقولك اصلية ههههه وهي درجات اولى حسبي الله عليهم بس

بواجي عادية حدها 50 الف بالكثير

أخذت إكسبدشن من الوكاله 2014 وقالوا لي جيبه على 8000 كيلو يعني أوّل تغييرة زيت

وطلعت الفاتوره 580 ريال ومن يومها سحبت عليهم وأشتري الزيت والفلتر من الوكاله وأغيره في البنشر لعلمي التام بأن كل صيانه تزيد عن الأولى ولأسف الشديد وكالات السيارات من جنبهافقط يبحثون عن الربح .

اما حبا والا مشا.    هذا مثل
قرأت لأحد الأعضاء الخبراء المختصين.   المطلق. عضو معروف يقول التغيير على ٣٠٠٠٠ ثلاثين الف
ومع انه اخبر مني لكني ارى انه على ١٠٠ الف حلوه.         
انا كان عندي فورد مشيت عليه ٦٠ الف. صاحبه الاول مدري متى غير البواجي
بعد ملاحظة البنزين.  اكتشفت ان اللمبه تولع على ٢٢٣ يعني يصرف حول ٣٠٠ كم
بعد تغيير البواجي.  اللمبه تولع على ٣٠٠ وفوق.  يعني البواجي كانت سبب في هدر. ٩٠ تقريبا. كيلو
لو نحسبها. خسارتي ١٢٠ تغيير بواجي وشغل يد.    كم مره عبيت وكم مره وفرت.    
الان. اي واحد يبي يغير بواجي.  اذا سيارته ماشيه فوق ال ٨٠ الف. عليه قبل كل شي يحسب
متى تولع اللمبه. سجل في ورقه.  واحسب داخل المدينه.   بعد تغيير البواجي احسب.   وبلغنا بالفرق
حاليا عندي الاسكاليد ماشي عليه حول ٤٨٠٠٠ ولا اعلم عن صاحبه الاول متى غير البواجي
افكر اغير. واشوف.    

اذا ما بتحترم صيانه الوكاله
احترم الشركه اللي صنعت السياره هما ادرى فيها
افتح الكتلوج حقهم وشوف ايش كاتبين لك.