رايكم ف هيونداي سوناتا 2018 ؟

عليكم السلام
انت كيف سواقتك وكيف تحافظ ع السياره ؟
لو هي هايلكس تعلنها لعن تبي تخرب
لو هي أردى سياره تحافظ عليها وتبي تمشي معك مثل الحلاوه
طبعا يبي يجي كم واحد يقول ولد عمي وولد خالي خبطت وخرب عليه كذا لا تصدقه
انت ماتدري كيف استخدامه
معي حاليا 2015 الدفعه الثانيه
ماشيه 140 الف السياره بسم الله عليها وكاله كل شي وباقي متماسكه والقطع أسعارها ارخص من تويوتا

معي 17 

نهائيا مانصحك فيها

خذ اكوووووورد وقطعها موذاك الغلا

بالخط جنوط 18 راسيه 

لكن صوت الزفلت داخل راسك ويقولون عزلها تحسن 
والله عزلها خايس

عيوبها المصنعيه كثيرة

قفل شنطة
رجه بالعكوس
طقه بالدركسون

المكيف تبريده يقولون صار احسن من اول 

لاوالله انه مثل ماهو
بعز الصيف التبريد عادي واقل من عادي
والعرق يصب وانتم بكرامه 

انصحك تاخذ جوووودة يابانيه 

انا اخذتها لاني سمعت ناس امتلكوها ومدحوها لي

وايضا الشكل عجبني وجذبني وكرهته الان

و صرفية البنزين متوسطة و المكينة من عام ٢٠٠٦ نفسها
الفل كامل مكينة GDI لكن غاليه ما يسوى عليك

صحيح نسيت شي

البنزين صرفيتها عاليه مقارنه بمثيلاتها بنفس الفئة
حتى لو تحط وضعية ايكو توفير الوقود 


وياصاحب الدسلايك دوس بيدينك ورجولك هنا 

وفي ردودي ومواضيعي السابقه ايضا 

عشان قلت الصحيح في السوناتا هههههههههههههه

كل واحد لة انطباع وراي وكل سيارة لها عشاق فية ناس تمدح وعندها تعصب
السيارة حسب استخدامك. معنا 2017 لها سنة ماشية 70الف
عيب الكوري عامة المكيف تبريدة متوسط داخل البلد اما مع الخط ممتاز
صرف البنزين متوسط حسب دعستك وانا اشوف انها زينة
وسيعة من الداخل ديكورات حلوة
اسعار قطع الغيار بعد الحادث الحمدلله على كل حال مع ولد اخوي
عكس امامي يمين 950ريال اصلي من المحلات وليس الوكالة
رفرف امامي340اصلي
صدام امامي400 اصلي
شمعة يمين 1300 اصلي
البطانة حقت الرفرف 100اصلي
مقص امامي 580
فلنجة الهوب350
ديمنو كهرب1600اصلي
مكيف 1600اصلي .طبعا انسرقت وهي واقفة

حرف الالف والله انك صادق
المشكله توها نازله بالمعارض ويمدحونها ويمدحون عزلها ومكيفها وهو الي مجربينها قليل لان توها نازله بالسوق
والمضحك يسبون الشكل الي قبلها الشكل القديم وعلى وقته الشكل القديم نفس الشيء مدح فيه وبعدين يسبونه بعد مانزل الشكل الجديد

واكلنا المقلب مثلك لكن بالاكسبلورر عام2005مافي منتدى الا ومدح قيره خصوصا منتدى مكشات
وان الموديلات الي قبل كانت تخبط والموديل هذا حسنوا قيره وطلعوا كذابين نصابين
وبعام 2006تغير شكل الاكسبلورر ونفس الشيء بالمنتديات
مدح بذا الموديل وان قير مايخبط مثل موديل2005الي كانوا يمدحونه

واخر موديل بالاكسبلورر دفع خلفي موديل2010ونفس الشيء مدحوا قيره
وانه اخر شكل وحلوا جميع العيوب المصنعيه واقولك
مره ثانيه كذابين نصابين تحكهم يدهم لازم يتفلسفون
ويسون نفسهم فاهمين على حساب المشاهدين

والي يضحك قبل4سنوات استكشفت ان الاكسبلورر
من عام2003الى عام2010نفس المحركاااات
بس الرديتر تغير فقط
وهم فلسفه كل مانزل موديل قالوا حسنوا جميع العيوب المصنعيه وقيره ماصار يخبط
كيف تحكمون وهو توه نازل مامشى حتى50الف عند المجربين ويمدحونه!!

المهم اكلنا المقلب وخبط القير وسلامتكم(:

هههههه اقصد العضو كوكو موب حرف الالف

كنصيحة افظل لك أكورد او ألتيما والكامري الجديد واصل المخازن  وابعد عن الكوري شكل يجذبك لكن بعد الاستخدام بفترة بسيطة تتمنى ماشريتها تقنية قديمة خاصة المكائن والبودي مجرد كرتون مقوى  

هي سيارة عملياً جيدة وتكرف معك مثل غيرها ولكن سعرها مبالغ فيه جداً خصوصاً الفل والنص فل
وفيها مشكلة المكيف مدري تم اصلاحها او لا
والمشكلة ماهي بس في البروده حتى في قوة دفع الهواء تحطه على اقوى درجة ويالله يوصل وجهك مدري هي مروحة سيارة من جدهم والا مركبين مروحة لابتوب

السيارة حلوة.
لكن تحتاج لعناية ومحافظة عليها أكثر من منافسيها اليابانيين.
اذا كنت مش محافظ مرة على السيارة ف السيارات اليابانية افضل لك

ما انصحك فيها ،،

الاكورد افضل ولا في مقارنة .

الفئة هذي عادة اللي يقتنيها يبغى سيارة عملية واقتصادية..
لذلك أرشح الاتيما الارخص بها الفئة و الاقل استهلاكا للوقود وتقريبا الاريح في القيادة
مواصفتها وشكلها مقبولة نوعا ما..
هذا في حال تبي تستخدم السيارة لفترة طويلة اما اذا تبي تبيع بعد اربع سنوات واقل فما تناسبك
وتوجه للاكورد اولا ثم الكامري.. بالنسبة للهونداي ما نصحك ولا يغرك الشكل بتمله بعد فترة..

ياخي ماعليك منهم روح مكتب اجار وخذ وحده جربها

مكيفها بارد للامانه

اذا نفسك في شي.لاتسأل يكفيك انتشارها يعني كل الناس اللي مشترينها مايفهمون واللي بالمنتدى الفاهمين

ككل سياره بتخررب من النهاية يعني تويوتا يقولك زيت وفلتر وامش وشف مشاكلها قير خبط مكينه صلبت مكيفي خرب

نيسان نفس الشي

هونداي نفس الشي على فكره كلهم مكيف بلف كهربائي

انا معي سوناتا 2017 ماشيه يمكن 110 الاف استخدام سنه ونص
النتيجه النهائيه م انصح فيها والخيارات البديله اكورد و كامري

انت وفلوسك وقبل كل شي استخر وترا البدائل كثيره " اكورد - كامري - مازدا - التيما - اوبتما " وانا معي سوناتا ولو يرجع الزمن بي اخذت مازدا .

ابعد عنها قدر الامكان من اسوا السيارات ، معاي وحده 2016 ماشيه 50 الف فيه نتعه فالقير وكل ما اوديها للصيانه يقولون برمجه ويبرمجونها وترجع بعد شهر نفس المشكله وفيها مشكله مع المنعطفات تحس ان الطاره بتقفل ووديتها الشركه وصلحوها والله يستر لا ترجع ، والحين لها يومين واقفه عند البيت فيها صوت طقطقه فالمكيينه قويه مرره وللحين ما فضيت اوديها للصيانه ، وانا محافظ على السياره اكثر من نفسي والسياره لو تشوفها تقول هذه وكالة ، حتى اكياس وكالتها موجوده للحين ، الله يعوضنا 

شفت كيف ياصاحب الموضوع !!

احنا اصحاب السوناتا ننصحك تبعد عنها

يعني ماعاد يبي لها شي

شوف الاكورد
المازدا الفل

الكامري خدومة لابعد درجة

كنت افكر فيها بس بطلت
خلاص

من بعد كلامكم
توووووووبه

الكوري صدق مخيسس معاي النترا ٢٠٠٧ وكانت مطفشتني اصوات بكل مكان مع ان استخدامي جدا نظيف وسواقتي سواقت شيبان وشريت ٢٠١٥ ومكيفها اسواء من ٢٠٠٧ واصوات ديكورات وغير الهواء تحس نفسك فاتح الدريشه  عن نفسي ممكن ابيعها واشتري سيفيك