موضوع ممشى السيارة

وعليكم السلام ورحمة الله 

انا اشوف حتى ١٥٠ الف كيلو مقبول 

مهما كانت نسبة المكينة الممشى ماله اي علاقة

الممشى يأثر على السيارة بشكل عام من عضلات وعمر القطع كل مازاد الممشى كل ما تحتاج صيانة واهتمام اكثر

والله ياخوي حسب الاستخدام والاهتمام والصيانه 
خذينا جمس من حرمه وسواق فلبيني ماشي ٣٠٠ الف 
لكن تسوقه ماشاء الله كنه ماشي ١٠٠ الف 
ويوم شيكت بالوكاله كان تشييكاته وكاله الى ٢٨٧ 
والموتر مع الي شراه اموره تمام 

ومره شريت كامري ١١ ماشيه٨٠ الف جننت حياتي كل شوي خراب 
مكيف عكوس دينمو ووووو 
بعتها خذت وحده ماشيه ٢٢٠ الف 
راعيها ماعليه عنده فوقها لكزس وماخذ الكامري للدوام 
يداوم بالجبيل يوميا وساكن الدمام 
وكان فرق سماء وارض بينهم صراحه 

وبالنسبه لفحص الكمبيوتر للمكينه انا ما اعتمد عليه لان مايعطيك نسبه صحيحه ١٠٠ ٪‏

خل يفحص لك السياره ويفصل الجهاز 
وبعدها خل يفحص وشف الفرق 
النسبه يعطيك اكثر شي على البواجي  وكذا 
ولاحظ كل ماجيت تفحص يقولك سوي تصفيه مكينه 
مره بعت موتر مغير بواجيه وفلاتره من اسبوع 
وقالوا غير بواجي للي بيشتري خخخخخ

واحد يقول اشتريت سياره مستخدمه ماشيه حدود 200الف يقول رحت فحصت المكينه اعطاني نسبة 96 يقول اشتريت السياره وبعد شهر بالضبط خبطت ويوم فحصها عند ورشه ثانيه قال هذي المكينه موظبه من قبل
فمحلات الفحص اجهزتهم رديئه ولاتعطيك نتيجه صحيحه 100% بعضهم يقيس لك نسبة البواجي وقوة شرارتها ويقولك هذي هي نسبة المكينه
وبخصوص الممشى الطبيعي اتوقع 30-40الف كيلو بالسنه بشرط اذا بتشتري سياره مستخدمه ماتكون ماشيه فوق ال180الف

السياره اللي حاشمها راعيها الى ٢٠٠ الف تعتبر نظيفه
وبعضهم اكثر

اما اللي مايفرق السياره عن الحمار اعزكم الله
هذا لو تمشي ٥٠ الف بتحسها ماشيه ٥٠٠ الف

ولنا في سيارات محلات التأجير اكبر مثال

اتفق مع اغلب الشباب اهم شي الاستخدام والصيانه

وسالت نفسي اكثر من مره نفس سؤالك ويوم اشوف السيارات الاستخدام امريكي مع كثير من الاقارب ماشيه حول 400 الف

وباقي محركاتها نظيفه هالشي يزيدني قناعه ان الاستخدام والصيانه هي الفيصل خاصه لو ماتعرضت لحوادث

عن نفسي بعت سياره ماشيه 375 الف لان باعتقادي ان عمرها الافتراضي انتهى وبتبدا مشاكل وورش

وكان بيني وبين صاحبها اتصال لسنتين بعد البيع وباقي السياره نظيفه وماخسر عليها كثير.

وانا شريت مره سياره ماشي ٥٥٠ تقريبا 
استخدمتها سنه من ابدع مايكون 
غير استهلاكيات فقط 
وبعتها وراعيها خذاها مكه وحصلتها بالشرقيه بحكم دوامه بعد شهرين تقريبا 
لو ماللوحه ماعرفتها من كثر ماكسرها وصارت تجيب الهم 
حتى عورني قلبي عليها خخخخ كانت معززه مكرمه معي ومع الي قبلي