أضف سؤال أو موضوع جديد          

مكاين السوناتا والعيب المصنعي .. اعرف السر

up 23 down 15



السلام عليكم ورحمه الله وبركاته

هذا الموضوع بنزله لان جاني اكثر من واحد وقال ان السالفه مكاين السوناتا فيها عيب مصنعي وانه حصل لها استدعاء في امريكا وعندنا ياغافل لك الله !!! وللامانه جاني الخبر من ناس اثق فيهم ونص خبر الاستدعاء كالاتي (( وجود شوائب معدنية تؤدي الى تلف عمود الكرنك))

للعلم الاستدعاء جاء على سيارات محدده بأرقام هياكل معينه ماجاء على كل السوناتات (( انتبهو للنقطه ذي ))

بما انه ماحصل عندنا استدعاء بالمنطقة العربية (( احتمال الاستدعاء يخص خط انتاج محدد وكان وقتها موجه هناك بحكم انه على ارقام الهيكل )) انا بقول وجهة نظري بالموضوع واللي اشوف انه السبب الحقيقي لتخبيط المكينه هذي بالذات

مشكلتهم الازلية ممرات ومسارات الزيت ضيقه وراس شخال الطرمبه صغير علشان كذا تعاني بدفع الزيت وتصير لزوجه 5w30 عليها كانها 10w40 فما بالك لو حطيت لزوجه اثقل من الاولى انت حكمت على مكينتك بالهلاك .. وهذا الشي لازم يعرفونه مستخدمينها على وجه الخصوص لاني متأكد ان اغلبهم يستخدمون زيت شل هيلكس المخييييس ودرجات لزوجه غريبه ودخيله علينا مثل 15w40و 10w40 واذا ناقشته قالك الوكاله تستخدمه ؟ طيب انا بسرد لك الاسباب اللي تخليك تهرب من هاللزوجات الغلط هروبك من الاسد :

1/ الله كرم بني ادم بالعقل ؟ افتح الكتلوج اذا معك سوناتا 2016 ( مدري عن موديلات 17 وفوق ) اتحداك تحصل اي لزوجه تنتهي ب w40 اتحددددددى

2/ يامستخدم هونداي لايغرك ملصق شل هيلكس على قربه الهواء تراه دعايه تجاريه لا اكثر ولا اقل ( انا على موتري هالاستيكر وساحب عليه واستخدم فوكس تيتان سوبر سن 5w30 ).. والدليل انها دعايات شوف محركات كيا نفس الهونداي بالضبططط ومع ذلك ينصحون بزيوت توتال !!! شفت ان الشغله تجاريه بحححته .. لابعد ازيدك من الشعر بيت لو انك تملك هونداي موديلات 2012 وتحت بتحصل موجود استيكرات زيوت كاسترول (( ومكتوب تنصح فيه الشركه وانه الافضل لسيارتنا )) بدل هيلكس اللي ماجاء الا ببدايات 2013

3/ من متى وحنا نسمع بلزوجه 15w40 و 10w40 بالله ؟؟؟ ماكنا نعرفها الا بمحركات الديزل خصوصا شل روتيلا 15w40 حق التريلات .. اما البنزين ماجت لزوجه 40w الا بالالماني وكانت محصورة فقط بلزوجتين الاولى 0w40 والثانيه 5w40 اما السيارات الاسيويه كوري ياباني تايلندي صيني محصورة بلزوجه 30w بنوعيها 10w30 و 5w30 والامريكي لزوجه 20w برضه نوعين هما 5w20 و 0w20 (( اما زيوت 20w50 مالنا شغل فيها ))

4/ عندي شك ( ماجزمت ) ان الشركات بعد فشل تسويق الزيوت الثقيله 20w50 قامت تصدرها بلزوجات اخف وهي 15w40 و 10w40 والدليل انها تتطابق بكل شي !!! كلهم زيوت نوعها معدني مكرر ومعاد تصنيعه من بقايا الزيت الاسود بحفرة البنشري، وكلهم يمشونك 5000 كيلو تقريبا بالاضافة الى ان تصنيفها كلها هو SL اسوأ واقدم تصنيف موجود حاليا وطالع من عام 2001 يعني قبل 17 سنه وقتها المكاين كانت على نظام الصبابات قبل ماتجي البخاخات والمكاين كانت حديد قبل ماتجيك مكاين الالمونيوم .. وبيومنا هذا اسوأ زيت ممكن يحصل على تصنيف SL بسهولة

5/ ماينفع مع مكاين السوناتا الا زيت خفيف مثل 5w30 طبعا بشرررط يكون تصنيفه SN وهو اجدد واحدث تصنيف من عام 2011 وحتى الان ولهذا التصنيف شروط خاصه اشبه بالتعجيزية ولايحصل عليها الا زيت عالي الجوده .. خصوصا لاصار تخليقي بالكامل هنا يمشيك من 8 الى 10 الاف وانت مرتاح.. الانواع كثيرة طب وتخير والافضل اذا تبي نصيحتي هو اللي استخدمه لموتري حاليا

6/ استبعدت درجه لزوجة 10w30 وليس العيب فيها (( لانها مذكورة بالكتلوج )) بل العيب بالشركات اللي تنزله بنفس تصنيف 20w50 و 15w40 القديم.. مااذكر مر علي زيت صاحي بذا الزوجه الا موتر كرافت فقططط ويجي نصف تخليقي وتصنيف SN

7/ مكتوب بكتلوجات الكوري هذا النص (( للحصول على افضل النتائج نوصي باستخدام لزوجة 5w30 .. ثم بعدها تعقيب وكاتبين لاتستخدم درجه لزوجه 5w20 في الشرق الاوسط )) والاسيوي عموما ماينصح بلزوجه w20 عكس الامريكي .. اعتقد انه نظام المكائن تختلف

________________________________________

وهذا رابط موضوعي القديم قبل سنتين.. وانا اعتبر هالموضوع امتداد له : https://hyundai.montada.haraj.com.sa/70247/مهم-جدا-..-سبب-تخبيط-مكائن-2400-الكورية-/

وهذا موضوع لعضو بالمنتدى يملك سوناتا وتشجع وفك كرتير المكينه ونظف طرمبه الزيت مع الشخال وطرح الفائدة من هالتجربه وزكززز على نصيحته بخصوص الزيوت : https://hyundai.montada.haraj.com.sa/81411/تنظيف-شخال-سوناتا-2014-وغسيل-المكينه/

واتذكر قد شفت فيديو انجليزي يقارن بين سرعه جريان الزيت بكامل ارجاء المكينه بين 5w30 و 20w50 الاول يحتاج 7 ثوان فقط والثاني احتاج حوالي 40 ثانيه!!! يعني دبل الاول حوالي 6 مرات.. ولو حصلته برسل الرابط

خلاصة الكلام // نستفيد من الموضوع ان هالمكينه بشكل عام يمكن تعيش معك لكن انتبه فيها خلل بتصميم مسارات الزيت وحلها استخدم 5w30 بتصنيف SN واتكل على الله (( راح ارفق صور مقارنه بين طرمبه زيت مكينه 2.4 وطرمبه 3.0 وشوف الفرق بنفسك ))

روابط صور لطرمبة الزيت بذي المكينه وكيف ان الشخال ثلاث أرباعه مقفول ( اذا شفت الصور وقتها بتتجرا وتحط زيت ثقيل أو لا ؟؟؟ ) :

الرابط الاول : https://i.postimg.cc/Yq4WsKgH/IMG-20190309-192322.jpg

الثاني : https://i.postimg.cc/HWMJw4CY/IMG-20190309-192326.jpg

الثالث : https://i.postimg.cc/GhqbGH93/IMG-20190309-192312.jpg

صورة طرمبة الازيرا 3.0 شوف الفرق : https://i.postimg.cc/vZ6zRxJ3/41-JV2-N6jv6-L-AC-SY400.jpg

صورة عمود الكرنك للسوناتا : https://i.postimg.cc/nhygDJKc/IMG-20190309-194010.jpg

صورة اضافية : https://i.postimg.cc/Lsj7kbvk/IMG-20190309-194002.jpg

ارجو التكرم وارسال رابط الموضوع بقروبات السوناتا والاوبتما موديلات 2009 وفوق .. يحزنني بصراحه اشوف مواضيع التخبيط لهذي المكينه ومجرد ماتسأله عن نوع الزيت تعرف وش السبب







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ابوهيثثم استفسار بسيط واتمنى تفيدني 
انا شريت سوناتا 2017 ماشيه 50 الف وراعي الموتر الاول يغير لها زيت لزوجته 10w30 او 15w40 علعموم زيت معدني والحين الموتر ماشي وبحول لزيت تخليقي 5w30 sn  سوالي هل فيه ضرر من تحويل من معدني الى تخليقي 5w30 ولالا 
سوالي الثاني ؟ شرايك زيت فوكس تيتان او امزاويل من ناحية صوت هدوء المكينة وافضل لها . 


up 1 down 0
sultan6466 2
قبل 4 شهر و 2 أسبوع



المعذرة اخوي سلطان ترى واجدين ومااقدر ألحق

غير ل 5w30 وان شاء الله مافيه ضرر

اموزيل افضل زيت بالعالم مايقارن بأي منتج محلي


up 0 down 0
ابو هيثم 7 2243
قبل 2 شهر و أسبوع