كيف اغير ماء الرديتر النترا 2014

وليش تتعب نفسك

مر اي ورشة او تغيير زيت يزينوها لك ب15 ريال

^^ اضم صوتي للرجال صحيح حلو الواحد يحاول يشتغل بنفسه في سيارته ويكتسب خبرة لكن طالما ماعندك الخبرة الكافية او العدة الكافية الأفضل تمر محل رديترات يسويها لك احسن يمكن لاسمح الله ما تعرف تركب الخرطوش زين ولازم بتحط عليه سليقون اصلي بعد ما تفكه من الكوع ف أحسن لك خلها من عندهم وتعلم كيف يفك ويركب ولمرة الجاية ان شاء الللله سوها انت

تمام الله يعطيكم العافيه ع النصيحه
وبعد موافقكم الرأي باللي قلتوه

شكراً لكم

اولاً طف الموتر وانتظر الموتر يبرد وتخف حرارة الموية افتح الغطاء شيك على موية الاديتر قبل
اذا لاحظت ترسبات او تغيير في لون الموية او اي شوائب او انسداد بعض الفتحات الداخلية

سكر غطاء الاديتر ورح لمختص يسويلك غسيل واذا احتاج الوضع تسييخ

اما اذا الامور تمام الموية صافية وداخلية الاديتر نظيفة فك السرة اللي تحت والغطاء مفتوح اللي فوق 
وانتظر حتى ينزل الماء كله 
بعدها اغلق الصرة وصب في البداية موية الاديتر حتى يغلق ثم اضف الماء المقطر ولو اني ضد الماء المقطر
الا في حالة واحدة اذا كان موية الاديتر اللي شريتها ماهي مخلوطة ويحتاج تخفيف فتضيف الموية المقطرة 
حسب التوصية اخيراً اذا امتلاء الاديتر اغلق الغطاء العلوي وشغل السيارة وشيك بالنظر هل فية تسريب موية من تحت
او من فوق 

وانتبه لنقطة مهمة جدا لازم تشغل السيارة كم دقيقة حتى ترتفع حرارة السيارة ويفتح البلف بعدها تطفي الموتر وترجع تعبي موية
لاتمشي على الموتر الا ممشى خفيف حتى يفتح البلف ولا تسرع ولا تترك السيارة وقت طويل قبل اضافة الموية حتى لاترتفع الحرارة
وبعد ماتضيف الموية الاضافة الثانية تكون الاضافة الثالثة من الغد او بعد كم مشوار خفيف نفتح وتشيك على مستوى الموية

ونصيحة اي شغلة تقدر تصلحها في موترك بنفسك صلحها انت استعن باليوتيوب والمنتديات وتعلم الشغلة بسيطة
يمكن لا سمح الله تحتاج لخبرتك الميكانيكية وانت قي موقف صعب او في طريق ويمكن تسعف لك مسلم وتاخذ ثوابه

للتنبيه كمية ماء الرديتر كاملة في دائرة التبريد لهيونداي النترا أكثر من 7 لتر