أضف سؤال أو موضوع جديد          

تجربتي لاستخدام سنتافي لمدة ٧ سنوات

up 14 down 1
فهد الرياض 1983 46
قبل شهر و أسبوع



السلام عليكم ورحمة الله وبركاته




اعرض لكم تجربة استخدام سيارتي سنتافي ٢٠١٤
بعد استخدام ٧ سنوات وثلاث شهور
والممشى ٢٠٥ الاف
السياره سته سلندر فل كامل




اولا الايجابيات
١/ سياره ممتعه في القياده 

٢/ السياره عمليه ونشيطه ودعستها حلوه

٣/ قطع الغيار الاستهلاكيه متوفره بسهوله وقيمتها معقوله وهذا اللي خلاني اشتري من هونداي

٤/ سهولة صيانة السياره ومافيها اي تعقيد حتى في الانظمه والتكنلوجيا اللي فيها الصناعيه يعرفون يصلحونها 

٥/ نقاوة الصوره في الكميرا الخلفيه اللي افضل من شركات كثيره في ٢٠٢١

٦/ لم تواجهني بعض المشاكل المعروفه والمنتشره بين السيارات مثل سلف او طرمبة مويه او تعطل مررحه او تعطل زجاج (ولكن توجد بعض المشاكل المختلفه)


ثانيا السلبيات
١/ العزل الارضي مع الحفر والزفلت الخشن وعزل الهواء من وجهة نظري اقل من المتوسط (وفي الشوارع الناعمه تحس انك راكب مرسيدس)  

٢/ ايضا يوجد اهتزاز في الكراسي الخلفيه تصدر بعض الاصوات مع الشوارع المحفره

٣/ على حجم السياره تعتبر تشرب بنزين وبمعدل سيارات اكبر منها



ثالثا المشاكل اللي واجهتني في ٧ سنوات استخدام


نهاية السنه الاولى / علق القير الصبح عند التشغيل ويرفض يعشق الين اطفي واشغل من جديد
 وتم الاصلاح على الضمان ( حساس قير او حساس فرامل ما اذكر بالضبط)


نهاية السنه الثانيه / المكيف صار حار وتم الاصلاح في الوكاله على الضمان ( لي المكيف وحساس وفريون) ومن بعد السنه الرابعه كل سنه تقريبا في بداية الصيف اغير لي او حساس واعبي فريون


نهاية السنه الثالثه / المرايه صارت ما تنصفط اوتماتيك وتم تغيير المرايه كامله في الوكاله على الضمان
ايضا صوت اسفل السياره وتم تغير جلد المقصات من تحت وجلد عمود التوازن ( خارج الوكاله )


السنه الرابعه/ الازرار في الدركسون لا تعمل وتم تغيير شريحة الدركسون ب ٢٣٠ ريال القطعه وشغل اليد


السنه الخامسه/ صوت تحت السياره وتم تغير اذرعه داخليه وخارجيه وايضا غيرت من نفسي مساعدات وجميع الجلد اللي ببطن الموتر تقريبا ب ٢٠٠٠ ريال
وايضا المرايه الثانيه تم تصليحها ب ١٠٠ لانها ما عاد تنصفط
ايضا تم اصلاح فضاوه في الدوده ب ٣٠٠ ريال
واصلاح قطعة بلاستيك داخل الدينمو قيمتها ٧ ريال بس تركيبها ب ٣٠٠ ريال (اللي عنده سنتافي يعرف هالمشكله وهي صوت بالطاره اذا حركتها وانت واقف


السنه السادسه/ صار في تهريب زيت من وجه المكينه وتم تغيير وجه المكينه ب ٤٥٠٠ تقريبا ( الوجه والزيت والبواجي وسير المكينه وكراسي المكينه والمخرطه وشغل اليد)


ايضا في السنه السادسه خرب البريك الاكتروني وتم تغيره تقريبا ب ٢٤٠٠ مع شغل اليد 

(نصيحه / كل ما كثرت التقنيه في السياره وصارت فل راح تكون صيانتها اعلى)


السنه السابعه / طلعت اشارات في الطبلون لمساعد المنحدرات والتراكشن والاوتو هولد وصلب الدركسون
وطلعت المشكله بكمبيوتر الدينمو
وكلفني من التشليح ١٥٠٠ مع التركيب
ايضا الفتحه لان صارلي سنتين ما استخدمتها
فتحتها وبالقوه تقفلت معاي
واعتقد انها تحتاج تشحيم

هذا اللي مر علي في السياره
وطبعا في تغيرات لزيت القير مرتين
 والفحمات ثلاث مرات 


ختاما اتمنى اني افدت غيري بهذا الموضوع
ولا يعني موضوعي ذم في السياره وتشويها
ولا مدح وترغيب فيها
هي مجرد تجربه نقلتها لكم للفايده


واتمنى اللي عنده تجربه اكثر من خمس سنوات لاي سياره انه يذكرها

ويظل اكبر نقطه ايجابيه عندي بالسياره سهولة صيانتها وتوفر قطع غيارها
واكبر عيب عندي مكيفها اللي من ثلاث سنوات لازم كل صيف اغير لي او اغير حساس واعبي فريون 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


شكرا لك على مصداقيتك
تعتبر تجربه سلبيه
شكلك شاركت في الحرب العالميه الثانيه
هههههههه
وش باقي ماغيرت

يمكن سوء استخدام او حوادث


......................................................................
تجربتي مع تويوتا شريتها مستخدم مصدوم ومصلح وجهيه داخليه
جلست معي ٩ سنوات

اللي غيرته
كمبروسر مرتين
وفحمات كل ٦ شهور
مساعدات وجلد مقصات مرتين
ودواسة البنزين مرتين غيرتها
صحن وفحمة كلتش مرتين
من ٥٧ الف إلى ٢٧٥ الف وهي على يدي
٩ سنوات
هذا اللي غيرته

اعتبرها تجربه ايجابيه

جربت اغلب ماركات السيارات تبقى تويوتا هي الأولى



عليكم السلام ورحمة الله وبركاته
ماهي معقولة الخرابات ذي كلها على ممشى ٢٠٥ ألف يا ان استخدامك سيء والا الموتر فيه عيوب


up 6 down 1
mohammed shareef 1074
قبل شهر و أسبوع



من السنة الأولى خرابات 
عندي المازدا 2010 
أكثر الأشياء هذه شد بلدها


up 4 down 1
السيد ملوكان 17
قبل شهر و أسبوع



مشكور على نشر تجربتك
لا تقارنون بين صناعة و اخرى
كل واحد و قدرته الشرائية لا تحرجون احد



up 4 down 5
مثقف سيارات 1121
قبل شهر و أسبوع



بعيد عن ذكاءك العاطفي يا مثقف السيارات 
التجربة صادمة من هونداي
في وقت أصبح سعر الاكسنت أغلى من سعر اليارس 
وهي نفس الفئة 


up 3 down 3
السيد ملوكان 17
قبل شهر و أسبوع



هو بالفعل هونداي كان فيها و ممكن ما زال و الله اعلم
مشاكل بكمبرسور المكيف و طقة القير
حسب متابعتي للمواضبع قديما" و حديثا"

و هذا اللي خلاني اصرف النظر عن توسان و طلعت راف فور ١٨ اقساط
قبل فرض اول ضريبة ٥% و الان مكمل معي ١٧٥ الف على خير
ان شاء الله انزل موضوع عن استخدامي له اذا كمل ٢٠٠ الف ان شاء الله


up 2 down 0
مثقف سيارات 1121
قبل شهر و أسبوع



يعطيكم العافيه على ردودكم

اللي يسال ويقول يمكن حوادث او سوء استخدام

الموتر لم يتعرض لحادث ولا سمكره وشد بلد الحمد الله
والتغيرات في الوكاله الين ١٢٠ الف
ولاني راعي قومات ولا سرعه

بالنسبه لبعض الاعطال اللي ذكرتها
مثل الجلد والبريك الالكتروني وتصفيط المرايه وشريحة الدركسون
ترا تعتبر جميعها قطع استهلاكيه في هونداي
واتوقع قليل تلاقي احد مستخدم ٧ سنوات وما غيرها

يمكن المشكلتين الحقيقيه اللي واجهتها هي تهريب الزيت من الوجه
وكمبيوتر الدينمو اللي غيرته
 والمكيف اللي اغلب ملاك هونداي يشتكون منه


up 5 down 1
فهد الرياض 1983 46
قبل شهر و أسبوع



انا جربت 2 وكلها اقدم شوي وبصراحة انكرفت كرف مو طبيعي الى حول 300 الف وبعدها بعتها وهي تغير مساعدات امامية بسبب صوت عند المطبات وهي عدادها 240 الف وفي الاخير طلع بسبب جلدة عمود التوازن+ شريحة الدريكسون وفي السنة ال6 + صيانات عادية فلاتر و سيور و اقمشة وبطارية+ المكيف ما لمسته بسبب انه من النوع القديم مكانيكي قوي مررة وبس


up 3 down 0
dell2012 1036
قبل شهر و أسبوع



الله يوفقك
اشكرك على طرح تجربتك الله يجزاك بالخير
وفعلا اذا حصلت القطع وحصلت احد يعرف يصلح العطل والله نعمة كبيرة


up 2 down 0
m1m1m1m1m1 478
قبل شهر و أسبوع



معي كيا اوبتما 2015 اخذتها وكالة ممشاها الحين 175 الف 
التغييرات غير زيت المكينة والقير والفلاتر والبواجي 
(في الوكالة)
2016- كمبروسر على الضمان 
2018 - مرايات على الضمان كانت تعلق 
2018- ظهر الكرسي للسائق على الضمان 
 2020 غيرت بلف الكمبروسر 

اول تغييره للفحمات قبل شهر امامية وخلفية 358 قيمتها 
ونظفت الدعسة وللاحتياط غيرت طرمبة البنزين على ممشى 150 الف



تجربة غريبة
انا كانت عندي سيارة مشابهة كيا سورينتو دبل ٦ سلندر ٢٠١٥ الشكل الجديد
بعتها قبل شهرين كانت ماشية ٢٦٠ الف ما خرب على فيها غير المكيف وغيرت الكمبرسور والثلاجة فقط
غير القطه الاستهلاكية ما خرب على شي في السيارة ابدا ولله الحمد


up 0 down 0
عبدالله نيازي 52
قبل 2 أسبوع و يوم



ماشاء الله اخ عبدالله
بعض السيارات مبروكه
حتى القطع الاستهلاكيه فيها تطول 
والجلد والمقصات تستمر سنوات وما تطلع صوت



up 0 down 0
فهد الرياض 1983 46
قبل 2 أسبوع